Killilersuinerit: Maanna Sisimiuniinnaq

Kingullermik nutarterneqarpoq

Naalakkersuisut Sisimiut illoqarfianni suli tuniluuttoqarmat killilersuinerit sivitsorniarlugit aalajangerput. Aasiaat Upernavillu killilersuiffiujunnaarput. Maleruagassat uku Sisimiuni malinneqassapput: 

  • Assartuutinut tamanit atorneqartunut ilaassaguit tamakkiisumik kapitissimassaatit. Taamaallaat marloriarlutit kapitissimaguit bussinut, timmisartumut imaluunniit angallammut attartukkamut ilaasinnaavutit.
    • Umiarsuarmut timmisartumulluunniit ilaalluni nammineerluni najugarisamut angalassagaanni ilinniariarluniluunniit angalassagaanni, imaluunniit akiuussutissamik kapitinniarluni katsorsartinniarluniluunniit umiarsuarmut timmisartumulluunniit ilaalluni angalassagaanni akiuussutissamik kapitissimanani tunillatsissimannginnermut uppernarsaateqarnermi ilaasoqarsinnaavoq.
    • Angalaqatigiit ataasiakkaat akiuussutissamik kapitissimanatik misissortissimanatilluunniit assartuutinut tamanit atorneqartunut ilaasinnaapput: Inuiit inuiaqatigiinnik sullissillutik angalasut, inuit akiuussutissamik kapitissinnaanngitsut aamma inuit assartuummi sulisut, kiisalu inuusuttut 18-it inorlugit ukiullit.

  • Inuit sapaatit akunnerisa kingulliit 12-it iluanni tunillatsissimasut akiuussutissamik kapitissimasutut isineqassapput.
  • Tuniluuffiusuni inuit silami illulluunniit iluani aaqqissuussinernut katersuuttut 20-t sinnerlugit amerlassuseqassanngillat.
  • Umiarsuaq sinersortaat Sarfaq Ittuk taamaallaat tamakkiisumik kapitissimasunit ilaaffigineqarsinnaavoq. Immikkut ittumik akuersissuteqartoqarnissaanut periarfissaqanngilaq.
  • Inuit Sisimiuniit aallartut, tamakkiisumik kapitissimanngitsut Kalaallit Nunaanni sumiiffimmut allamut tikinnerminni ulluni tallimani angerlarsimaannassapput aammalu Covid-19-imut misissortissallutik.
  • Inuit tamakkiisumik kapitissimasut kisimik timersornermi atortunik atuisinnaapput imaluunniit neriniartarfiliarsinnaapput imerniartarfiliarsinnaallutillu.
  • Sumiiffinni tamanit atorneqartuni, soorlu napparsimmavinni, pisiniarfinni, kommunit allaffiini assartuutinilu tamanit atorneqartuni qanermut assiaquteqartoqassaaq. Inuusuttut 18-it inorlugit ukiullit ilaatinneqanngillat.

Kapitinneq kingullermiit ullut 14-nit qaangiuppata tamakkiisumik akiuussuserneqarsimasutut isigineqalissaaq.

Killilersuutit nutaat 31. oktober 2021 tikillugu atuukkallartussaapput.

Nalunaarut manna siunissami sumiiffinni tuniluuffiusuni atorneqartartussaavoq.