Killilersuinerit sivitsorneqarput: Aasianni, Sisimiuni Upernavimmilu maleruagassat ukuupput

Kingullermik nutarterneqarpoq

Naalakkersuisut aalajangerput, illoqarfinni pingasuni, maanna tuniluuffiunerpaasuni killilersuinerit sivitsorniarlugit. Aajuku Sisimiunut, Aasiannut Upernavimmullu maleruagassat atuuttut:

  • Assartuutinut tamanit atorneqartunut ilaaniaruit tamakkiisumik kapitissimassaatit. Marloriarlutit kapitissimaguit aatsaat bussinut, timmisartumut angallatinullu attartortakkanut ilaasinnaavutit. Akiuussuserneqarsimanngitsutut misiliummik negativiusumik takutitsisinnaagunik, umiarsuarmut timmisartumilluunniit ilaallutik angalasinnaatitaapput najukkamut angerlarnermi, ilinniartiartornermi imaluunniit akiuussusertikkiartoraanni suliaritikkiartoraanniluunniit. Eqimattat ataasiaakkaat assartuutinut tamanit atorneqartunut akiuussuserneqarnngikkaluarlutik ilaasinnaassut: Inuit qinikkatut inuiaqatigiinni suliassaqartitaasut, inuit akiuussuserneqarsinnaanngitsut, inuit assartuutini sulisut kiisalu inuusuttut 18-iliineqanngitsut. Inuit tunillatsissimasut sapaatit akunnerisa 12-it kingulliit iluanni kapitissimasutut isigineqassapput.
  •  Piffinni tunillaassuiffiusuni tamat orniguffigisinnaasaanni inuit 20-t sinnerlugit katersuuteqqusaanngillat, aaqqissuussaq silamiuppat imaluunniit illup iluaniuppalluunniit.
  • Sinersortaammut Sarfaq Ittuk-mut taamaallaat inuit tamakkiisumik kapitissimasut ilaasinnaapput. Immikkut ittumik akuerineqarnissamut periarfissaqanngilaq.
  • Tamakkiisumik kapitissimanngitsut, sumiiffinnit pingasuusunit angalasut Kalaallit Nunaanni sumiiffimmut allamut tikinnerminni ulluni tallimani angerlarsimaannassapput Covid-19-imillu tunillatsissimanerlutik misissortissallutik.
  • Tamakkiisumik kapitissimasut kisimik, timersortarfinnik atuisinnaapput imaluunniit neriniartarfinnut imerniartarfinnullu isersinnaapput.
  • Sumiiffinni tamanit iserfigineqarsinnaasuni tamani, soorlu napparsimmavinni, pisiniarfinni, kommunit allaffiini assartuutinilu tamanit atorneqartuni qanermut assiaqut atorneqassaaq. Inuusuttut 18-it inorlugit ukiullit ilaatinneqanngillat.

Siusinnerusukkut Upernaviup nunaqarfii maleruagassanut ilaatinneqarput, maannali taakku ilaatinneqanngillat.


Killilersuinerit nutaat 31. oktobar 2021-p tungaanuugallartoq atuutissapput.

Nalunaarut manna siunissami sumiiffinnut tuniluuffiusunut tamanut atorneqartartussaavoq.