Sisimiuni tuniluutingaatsiarneq: Tunillatsissimasut arfineq pingasunik ilapput

Ullup unnuallu kingulliup ingerlanerini inuit 20-t Coronavirusimik tunillatsissimasut nassaarineqarput. Tunillatsissimasunit arfineq pingasut Sisimiuniipput.

Sisimiuni inuiaqatigiinni tunillaassuuttunit assigiinngitsunit tuniluuttoqarpoq, taakkunannga arlallit aallaavii ilisimaneqaratik.

Sisimiuni nassaarineqartut saniatigut Nuummi arfinillit, Aasianni sisamat aamma Kangaatsiami Qaqortumilu tamarmik immikkut ataaseq tunillatsissimasut nassaarineqarput. Tunillatsissimasut Sisimiut avataaniittut amerlanersaat Sisimiuni tunillatsissimapput. Taakkununnga ilaatigut umiarsuarmi inuttat arfinillit tunillatsissimapput. Inuttat tunillatsissimasut maanna nunami mattusimatinneqarput aammalu inuttat sinneri umiarsuarmit nioqqusaanngillat. Tamanna malittarisassat atuuttut naapertorlugit oqartussaasunik qanittumik suleqateqarnikkut ingerlanneqarpoq.

Maanna Sisimiuni misissugassatut tigusat amerlangaatsiartut Nuummi laboratoriami misissoqqissaarneqaleruttorput.
”Pissutsit suli ilungersunartutut isigisariaqarpagut. Sisimiuni eqqaanilu inuiaqatigiinni tuniluuttoqangaatsiarpoq, aammalu siusinnerusukkut Sisimiuniit nunap sinneranut tuniluuttoqarnera takoreerparput. Innuttaasut tamarmik 2 meterinik ungasissuseqarlutik qanillinaveersaarpata, katerittunut akulerunnaveersaarpata, errortorluartarpata tuniluunnermik killilersueqataasussaavugut, kisiannili aamma tamatta oqartussaasut innersuussutaannik malinninnissarput pisariaqarpoq”, Nakorsaaneq Henrik L. Hansen oqarpoq.

Tamatuma saniatigut nunatsinni innuttaasut kaammattorneqarput, nappaammut ersiuteqalernissaq eqqumaffigilluaqqullugu.

”Ersiuteqalersut tamarmik angerlarsimaannarnissaat piaarnerpaamillu misissortinnissaat pingaaruteqartorujussuuvoq”, Henrik L. Hansen oqarpoq.