Suli Sisimiuni tuniluuttoqartoq, Avannaaniilli pitsaasunik nutaarsiassaqartoq

Kingullermik nutarterneqarpoq

Sisimiuni covid-19-imik tunillatsissimasunik allanik arfineq pingasunik nassaartoqarpoq. Maannamut misissuinerugallartunit takutinneqarpoq, matumani tuniluuffiit ilisimaneqareersut avataanni tuniluuttoqartoq. Suliffeqarfiit sullissiviillu arlallit, kiisalu napparsimmavik tunillaaviusimasunut ilaapput. Tunillatsissimasut amerlanersaat kapitissimanngillat imaluunniit ataasiaannarlutik kapitissimallutik. Pingaartumik inuusunnerusut tunillatsittarput, taamaalillutillu tuniluunnermik ingerlatitsisuullutik.

Corona pillugu Allattoqarfik tuniluunnermik annikillisaaniarluni attaveqarfigineqarsimasunik ujartuivoq. Kisiannili Sisimiuni tuniluuttoqaqqinnissaa, aammalu pissutsit maannatut itsillugit sumi tamani tuniluuttoqarnissaa naatsorsuutigineqartariaqarpoq. Tamanna maannamut Kalaallit Nunaanni Covid-19-ip tuniluunnerani tunillatsissimasut amerlanerpaaffigaat annertunersaallunilu.

Sisimiuni misissuisarfik

Tuniluunneq killilerneqarsinnaassappat misissuisarfimmik allamik ammaasoqarnissaa pisariaqarluinnarpoq. Taamaattumik Qeqqata Kommunia suleqatigalugu Sisimiuni misissuisarfimmik pilersitsisoqarnialerpoq. Kommuni atortussanik sulisussanillu atugassiinissaminik neqerooruteqarpoq.

Covid-19-imik napparsimasut unitsinneqartut
Covid-19-imik napparsimasut marluk napparsimmavimmut unitsinneqarput, taassumalu aappaa katsorsarneqarpoq, kisiannili suli inuunerminik ulorianartorsiortutut oqaatigineqarsinnaanngilaq, taamaattumillu tunillatsissimasut Sisimiuniiginnarallarsinnaapput.

Avannaaniit Aasianniillu nutaarsiassaq nuannersoq
Avannaanili pissutsit ingerlalluarput. Tasiusami tuniluuttoqaqqinneranik malunnartoqanngilaq. Aamma Upernavimmi tuniluunneq maannamut killilerneqarsimasutut isikkoqarpoq, tunillatsissimallutik tuniluussinnaasut ikittuinnaallutik. Kullorsuarmi napparsimasoqarneranik nalunaaruteqartoqarnera peqqutigalugu bioanalytikeri Kullorsuarmut misissugassanik katersuiartortinneqarpoq. Misissuinerit 15-it tamarmik tunillatsissimanermut ersiuteqanngillat. Maannarpiaq nunaqarfinnut allanut tuniluuttoqarneranik takussutissaqanngilaq.

Aasianni pissutsit suli malinnaaffigilluarneqarput. Aasianni, Kangaatsiami Qasigiannguanilu misissugassanik katersuisoqaqqissaaq. Suliniutinik tamanik nukittorsaanissaq siunertaralugu misissuisarfimmik pilersitsinissaq pillugu Kommune Qeqertalik suleqatigineqarpoq.

Tunillatsissimallutit tunillaasinnaasut: 57

Tunillatsissimasut katillugit: 168

Aaqqittutut nalunaarutigineqartut katillugit: 108

Misissugassanik tigusiffigineqartut katillugit: 44.501

Napparsimmavimmi uninngasut katillugit: 2

Toqusut katillugit: 0