Peqqinnissaqarfimmut sianertartut amerlavallaartut

Oqartussaasut nunatsinni sumiiffinni assigiinngitsuni tunillatsissimasunik ujarlerlutik ulappuseruttorput. Tamatuma kingunerisaanik illoqarfinni nunaqarfinnilu eqqorneqartuni misissuinerit annertusineqarput. Innuttaasut tunillatsissimasunut qanillisimasut misissortinnissamut paasissutissiivigineqarlutik oqartussaasunit attaveqarfigineqarumaarput.

Peqqinnissaqarfik sumiiffinni tamani qanillisimasunit pilertornerpaamik misissugassanik katersuilluni ulapittorujussuuvoq. Tamatuma saniatigut innuttaasut Covid-19-imut ersiutillit, tikinnerminniit ullut tallimassaanni misissortittussat allallu misissugassanik tigusiffigineqarnissamut salliutinneqarput.

Misissortinnissamut periarfissat pillugit apeqquteqarniarlutik sianertartut amerlavallaarujussuarneri peqqutigalugu napparsimasut piaartumik katsorsartariallit Peqqinnissaqarfimmut attaveqarniartarnerat ajornakusoorsinnaavoq.