Akissutissat amerlasuut corona.nun.gl-imi nassaarineqarsinnaapput
Kingullermik nutarterneqarpoqNunatsinni Covid-19 tunngatillugu innuttaasut paasiniaasinnaanissaat pingaaruteqarmat nuannaarutigaarput inuit amerlasuut Corona pillugu Paasiniaavik Corona hotline atorluarmassuk.
Naak Corona pillugu paasiniaavimmut sianernerlutik akineqartartut amerlagaluartut, ajoraluartumik ilaqarput sianeraluarlutik akineqanngitsoortartunik. Tassani peqqutaavoq sapaatip akunnera kingulleq sianerlutik emailikkut allallutik saaffiginnittartut marloriaatinngorsimammata.
Naak pissutsit killilersuinerillu sukkasuumik allanngorarluartut corona.nun.gl-imi akissutissat amerlanerit nassaarineqarsinnaapput. Taamaammat neriuutigaarput massakkumuugallartoq nukingiussassaqartuarnera annikillisinniarlugu innuttaasut amerlanersaat periarfissaq taanna atorluarumaaraat.
Paasissutissalli paasinanngippata imaluunniit iserfigineqarsinnaanngippata Paasiniaavimmut attaveqarnissat kaammatuutigineqarpoq.
Corona pillugu Paasiniaavik 801100 ulluinnaat tamaasa nal. Arfineq pingasuuniit sisamap tungaanut ammasarpoq.