airplanebooksbriefcase business cogs cross election entertainment fish house law lockmedicalpeopleselfservices socialtax

Covid-19-imut akiuussutissaq, Johnson & Johnson-imeersoq atorneqassanngilaq

Akiuussutissaq, Johnson & Johnson-imeersoq qaqutigoortorujussuarnik annertuunilli kingunerluuteqartartoq paasineqarpoq. Taamaattumik Danmarkimi Peqqissutsimut Aqutsisoqarfik aalajangerpoq, akiuussutissaq Johnson & Johnson-imeersoq danskit akiuussutissamik kapuinerannut ilaatinneqassanngitsoq. Aamma Kalaallit Nunaanni atorneqassanngilaq.
4. maj 2021

Tamanna akiuussutissanik kapuinerup qaqugu ingerlanneqarnerata naammassinissaanut sunniuteqartussaavoq. Maanna akiuussutissanik tikisitsisarnerup sukkassuserisaa atorlugu Kalaallit Nunaanni inersimasut tamarmik ukioq manna 1. septembari nallinnginnerani tamakkiisumik akiuussutissinneqarsimassasut naatsorsuutigineqarpoq. Siunissami suliffeqarfimmit Moderna-mit akiuussutissanik taamaallaat atuisoqarnissaa naatsorsuutigineqarpoq.

Akiuussutissanik kapuineq ulappuffiusoq

Sapaatit akunnerini tulliuttuni akiuussutissanik kapuisut ulapputtorujussuusussaapput. 6. – 14. maajimi Tasiilami nunaqarfiinilu akiuussutissanik kapuisoqassaaq. Akiuussutissanik kapuisut aappaat 10. – 18. maajimi Kalaallit Nunaata kujataani angalassapput. Tassani inuit kapiteqqittussat aammalu apriilip qaammataani siullermeernermi kapitinniaratik aalajangersimasut akiuussutissamik kapitinnissamut neqeroorfigineqassapput.

Innuttaasut 18-inik ukiullit utoqqaanerusullu tamarmik akiuussutissamik kapitinnissamut neqeroorfigineqartut akuerseqqullugit kaammattorneqarput. Kisianni naartusut milutsitsisullu maanna akiuussutissamik kapitissanngillat, akiuussutissaq taakkununnga akuerisaanngimmat. Akiuussutissat atorneqartussat suliffeqarfimmit Moderna-meersuussapput. Akiuussutissamik kapitissimasut covid-19-imik napparsimarujussualinnginnissamut pitsaasumik qulakkeeriffigineqartussaapput. Nappaatip tuniluutilernissaa pinngitsoorniarlugu sapinngisamik amerlanerpaat kapitinnissaat pingaaruteqarpoq.