airplanebooksbriefcase business cogs cross election entertainment fish house law lockmedicalpeopleselfservices socialtax

Apriilip maajillu qaammataani 2021-mi Covid-19-imut akiuussutissamik kapisinissamut pilersaarut

Akiuussutissanik Danmarkimut ikinnerusunik nassiussisalerneq aammalu AstraZenecap akiuussutissatut atorunnaarallarneqarnera pissutaallutik, siunissami aggersumi Kalaallit Nunaat akiuussutissanik naatsorsuutigisamiit ikinnerusunik tunineqassaaq. Taamaattorli aalaakkaasumik tunineqartarnissaq suli naatsorsuutigineqarpoq, taamaasilluni akiuussutissanik kapuuinissamut suliniut ingerlatiinnarneqarsinnaaniassammat, kisianni arriinnerusumik ingerlanneqassalluni.
29. marts 2021

Kapitinneq
Periusissiamut pingaarnertut anguniakkat tassaapput eqimattat napparsimarujussualernissaminnut toqunissaminnulluunniit aarlerinaateqarnerpaat. Taamaasilluni nappaalanersuaqarnerup kingunerisaat ajornerpaat pinngitsoortinnissaannut periarfissaassaaq. Siunissami sapinngisamik amerlanerpaat akiuussutissalerneqarnissaat anguniarneqarpoq, taamaasiornikkut nappaalanersuaq siaruaassinnaannginniassammat.

Siullermik illoqarfiit annersaat toqqaannaq tikiffigineqarsinnaasuni akiuussutissanik kapisisoqarnikuuvoq, tassa Nuummi, Ilulissani, Aasianni, Sisimiuni Qaqortumilu. 65-inik ukiullit sinnerlugillu kapineqarnikut tamarmik, kiisalu inuit napparsimalerujussuarnissamut immikkut aarlerinartorsiortutut nakorsamit naliliiffigineqarnikut sullinniarneqarnikuupput. Tamatumunnga ilutigalugu iluatsilluartumik Issittumi Sakkutooqarfik suleqatigalugu suliniummik naammassinnilluartoqarpoq, matumani Qeqertarsuatsiaani Paamiunilu akiuussutissanik kapisisoqarnikuulluni.

Qaammatini aggersuni anguniagaq tassaavoq, Avannaani, Tunumi Kujataanilu kiisalu Kitaani illoqarfinni nunaqarfinnilu sinneruttuni akiuussutissanik kapisinerup aallartinnissaa. Makku tunngavigineqarumaarput:
  • Avannaani, Tunumi Kujataanilu immikkoortuni, killilimmik atassuteqarfiusuni, 18-inik ukiullit utoqqaallu tamarmik ataatsikkut kapineqassapput. Tamanna aamma nuna tamakkerlugu nunaqarfinni tamani atuutissaaq.
  • Kitaani illoqarfinni, suli akiuussutissanik kapisinermik aallartitsiviunngitsuni, 50-inik sinnerlugillu ukiullit tamarmik siulliullugit akiuussutissamik kapineqarnissaannik neqeroorfigineqassapput.
  • Naggataatigut illoqarfinni ukioqatigiiaat nukarliunerusut akiuussutissamik kapineqarnissaminnik neqeroorfigineqassapput.

Apriilimi maajimilu aalajangersimasunik pilersaaruteqarneq
Pilersaarutit aalajangersimasut ukuupput:
  • Pingasunngorneq apriilip 7-at: Kangerlussuaq (16-inik ukiullit utoqqaallu tamarmik)
  • Sisamanngorneq apriilip 8-at aamma tallimanngorneq apriilip 9-at: Maniitsoq (50-it sinnerlugillu ukiullit tamarmik)

Utaqqiissaasumik pilersaarutit tulliuttut ukuupput:
  • Sapaatit akunneri 15 aamma 16: Kujataani nunaqarfiit kiisalu Narsaq, Nanortalik aammalu Arsuk (18-inik sinnerlugillu akiullit tamarmik).
  • Sapaatip akunnera 17: Qeqertarsuaq aamma Qasigiannguit (18-inik sinnerlugillu akiullit tamarmik).

Tunumut Qaanaamullu tunngatillugit pilersaarutit
Tunumi innuttaasunut apriilimi/maajimi akiuussutissamik kapisinissamut pilersaarutissat aalajangersimasut sulissutigineqarput. Akiuussutissanik naammattunik tigusaqartoqarpat, taava aamma qaammatini taakkunani Qaanaami akiuussutissanik kapisinerit ingerlanneqassapput.

Immikkoortunut sinneruttunut pilersaarutit
Qaqugukkut akiuussutissanik tigusaqarneq apeqqutaatillugu, Upernavimmi aammalu Uummannami nunaqarfiinilu akiuussutissanik kapisinernik ingerlatsinissamut piffissaliussisoqassaaq.

Akiuussutissalersuinerup immikkoortua kingulleq, tassa kitaani illoqarfinni anginerpaani innuttaasunik 65-it ataallugit ukiullit akiuussutissamik kapineqarnissaat (Nuummi, Ilulissani, Aasianni, Sisimiuni, Maniitsumi, Paamiuni aamma Qaqortumi), kiisalu Kitaani nunaqarfinni sinneruttuni, akiuussutissat naammalerpata, ingerlanneqarumaarpoq.

Kalaallit Nunaanni akiuussutissat suuussusaat
Maannakkumut tikillugu suliffeqarfissuarmiit Pfizer/BioNTech-imit akiuussutissaq COMIRNATY® kisimi atorneqarpoq. Akiuussutissap uninngasuutiginissaa assartornissaalu ajornakusoorpoq. -80 graderini uninngasuutigineqassaaq atorneqannginneranilu imerpallatsinneqaqqaassalluni. Taamaattorli najoqqutassiat malillugit akiuussutissalerinerit naammassineqarsinnaasimapput, isumalluutinilli atuineq annertuvoq.

Taarsiulluguli akiuussutissaq Moderna COVID-19 (mRNA-1273) tigusalissallugu, sapaatip akunnera 14-imiit isumaqatigiissutigineqarpoq.. Pfizer/BioNTech-imiit akiuussutissatuulli ittoq pineqarpoq, tassa mRNA aallaavigalugu akiuussutissatut taaneqartartoq. Pfizerimit akiuussutissatuulli assinganik sunniuteqartarpoq, uninngatinnissaali ajornannginnerulluni, pissutigalugu taamaallaat – 15 aamma – 25 gradit akornanniitillugu qerisinneqarsinnaammat, nunatsinni assartornissaa ajornannginneerarsuanngussalluni. Siullermiit tullianut akiuussutissamik kapitinnerup sivisussusaa sivikinnerpaamik ullut 28-it qaangiunnerini pissaaq.

Kalaallit Nunaat piffissami kingusinnerusumi akiuussutissamik suli allamik neqeroorfigineqarnissaa periarfissaavoq, tamatumunnga peqqutaalluni akiuussutissat qulaani eqqaaneqartut killeqarneri.