Napparsimanermut ersiuteqaleruit

Covid-19-imut ersiutit nalinginnaasut nuannermit influenzamillu nalunngisannut assingupput.

Kissarneqarneq
Panertumik quersorneq
Anersaartornermi ajornartorsiorneq
Qasoqqaneq
Mamassusersiuutaarunneq naamasinnaassuseerunnerlu
Toqqusaarlunneq
Sorluit milinngasut

Ilaasa aamma ersiutit allat nalaassinnaavaat, soorlu meriannguneq meriarnerlu.

Ersiutit inummiit inummut allanngorarsinnaapput, ersiuteqarnerlu soorlu kissarneqarneq, COVID-19-imik nappaateqarnermut qulakkeerinnissinnaanngilaq.

Covid-19-imut ersiuteqarnermi allatulluunniit puakkut aseruuttoornermi

Puakkut aseruuttoornermik ersiuteqaruit napparsimasutullu misigalutit, peqqissinissavit tungaanut angerlarsimaannarnissat innersuussutigineqarpoq.

Peqqissutsikkut immikkut tunngavissaqaruit peqqinnissaqarfimmi misissortissinnaavutit. Puakkut aseruuttoornermik ersiuteqarlutit napparsimasutullu misigalutit aamma 65-inik ukioqaruit utoqqaanerullutilluunniit, naartuguit imaluunniit nappaateqaruit covid-19-imut tunillatsillutit navianartorsiortitsisinnaasumik, taakkuusinnaapput immikkut tunngavissat.

Akiuussuserneqarsimaguit, tunillaassuinermik pinaveersaartitsinissamut innersuussutit innuttaasunut tamanut atuuttut aamma illit malissavatit. COVID-19-imut ersiuteqaruit aamma illit iliuuseqassaatit, angerlarsimaffimmi mattusimallutit aamma eqqiluisaarnissaq eqqiaanissarlu annertuumik eqqumaffigalugit.

Akiuussutissat 100%-imik sunniuteqarsinnaannginnerat taamaattumillu akiuussusertinnikuugaluarluni COVID-19-imik tunillatsissinnaanermut suli annikitsumik aarlerinaateqarnera tamatumunnga pissutaavoq. Akiuussutissamik kapitinnikup nammineq ersiuteqanngikkaluarluni nappaateqarsinnaanera taamaalillunilu allanik tunillaassuisinnaaneranik akiuussutissamik kapitinnerup pinngitsoortitsisinnaanera aammattaaq suli uppernarsineqanngilaq.