Suliffeqarfimmi eqqiluisaarneq

  • Sulisut, pulaartut, sullitat, atuartut, ilinniartut allallu assamminnik errorlutik imaluunniit assammut spriti atorlugu eqqiluitsuutitsisinnaanerat ajornaatsuutiguk.
  • Sumiiffinni inuppassuaqarfiulluniluunniit attugassarpassuaqarfiusumi assannut bakteriaajaatit pissarsiariuminartuussapput, ass. pisortat ingerlatsiviutaanni, isaarissani, suliffeqarfinni, niuertarfinni, nerisassanik sassaalliuteqartarfinni, timersortarfinni il.il.
  • Ullup ingerlanerani assannut spritip immernissaa eqqumaffigineqassaaq, assannullu spritimik isaarissamiittoqarnissaa attorneqartartullu, ass. akiliisarfiit, automatit normunik tigusisarfillit, kaffeautomatit, nillataartitsiviit il.il., eqqaanniittoqarnissaa qulakkeerneqassaaq.
  • Inini kikkunnit tamanit iserfigineqarsinnaasuni amerlasuunilluunniit isersimaffigineqarsinnaasuni, ass. suliffeqarfinni, imeq qaqorsaallu atorlugit errortorsinnaanissat ajornaatsuussaaq allarutissianillu ataasiaannarlutik atortartunik allartertoqarsinnaassalluni. Allarutit tamanit atugassat qaqorsaatillu manngertut atornaveersaarneqassapput.
  • Assannut spritip sukumiisumik errortorneq taarsersinnaanngilaa aamma assaat errortoqqaarsimanngikkaanni sunniutikinnerussalluni. Taamaattumik assaat ersarissumik ipeqaraangata imeq qaqorsaallu atorneqartuaannassapput. Taamaakkaluartoq assannut spriti errortoreernerup kingorna tapertaasinnaavoq tassa assannut spriti tunillannartuiaataammat pitsaasumik sunniuteqartartoq. Tamatuma saniatigut imeq qaqorsaallu atorlugit assaat errortornissaannut periarfissaqanngiffimmi, assannut spritip atornissaa pitsaasuusinnaavoq.

Kikkunnit tamanit attorneqarsinnaasut tassaapput amerlasuunik attorneqartartut Ass. tigummiviit, sinaakkutit, innaallagialersuiffiit, tuugassat, tastaturit, akiliisarfiit, issiaviit ornavaffii, nerriviit sinai, pinngussat, atortut, kuuffiit, perusuersartarfiit allarpassuillu qaavi amerlasuunit attorneqartarput.

Attorneqartartut amerlappata tuniluunnerunissamut aarlerinaat malunnaatilimmik annerulissaaq. Taamaattumik kikkunnit tamanit attorneqartartunik eqqiaakulanissaq immikkut ittumik pingaaruteqarpoq.

Imeq qaqorsaallu atorlugit eqqiaanikkut ipeq tappiorannartullu pisattat qaavinit kaanngartinneqarlutillu piiarneqartarput, taamaalillunilu tuniluuttoqarnissaannut aarlerinaat minnerulersinneqartarluni. Amerlanertigut imeq qaqorsaallu atorlugit eqqiaaneq naammattarpoq, nalilersuereernerulli kingornagut mianersornissamik tunngaveqarluni bakteriaajaat ilanngunneqarsinnaavoq.

Pisattat masatserneqarnissaminnut naleqqussagaanngitsut, ass. elektronikkit bakteriaatinik salinneqarsinnaapput. Tamakkualu saniatigut atortussanittaaq allanik peqarpoq eqqiaatit allat atorlugit eqqiarneqartariaqartunik, ass. qulliit UV-t, gassit dampilluunniit. Taamaattoq pisariaqartuaannarpoq sioqqutsisumik eqqiaasarnissaq, inimi bakteriaajaaffiusussami sukannersunik maleruagassaqarnissaq kiisalu sulisut atortunik passussisinnaanissaminnut immikkut tunuliaqutaqarnissaat.

Eqqiaasarneq pisartunut naleqquttumik akuttussusilerneqartariaqarpoq, taamaaliornikkut qulakkeerneqassammat inini pisunilu pulaarterpassuaqarfiusartumi aamma/imaluunniit attorneqartartunik akulikitsumik uteqqiattumillu eqqiarneqartarnissaat. Assersuutigalugu paaqqinnittarfinni, atuarfinni, niuertarfinni nerisassanik sassaalliuteqartarfinni, pisortat angallassissutaanni, timigissartarfinni, inuussutissarsiorfinni il.il.

Ukiup qanoq ilineranut naleqquttumik eqqiaasarneq akuttussusilerneqartariaqarpoq, taamaaliornikkut qulakkeerneqassammat ukiassalernerani ukiamilu akulikinnerusumik eqqiaasoqartarnissaa. Atisanittaaq, coronavirusimik mingutsinneqarsinnaasunik, akulikinnerusumik errorsisarnissaq atuuppoq, naak tamakkunatigut tuniluunnerup pinissaa killeqarnerarneqaraluartoq. Tamakkua saniatigut coronavirusip nerisassatigut tuniluuttarneranut takussutissaqanngilaq.

Attorneqarsinnaasunit tuniluuttoqarnissaata pinaveersaartinnissaanut periutsit:

  • Tamanit attorneqarsinnaasut suussusersinissaat nalunaaqutsernissaallu, soorlu matut tigummiviit tuugassallu.
  • Attorneqarsinnaasut pisariaqanngitsut peerneqassapput, soorlu sullissinerup pitsaassusianik nalilersuisarfiit tuugassartallit, pisiassanik immikkoortitsilluni akiliisarfiit eqqaanni allagartaliussat il.il., taarserneqassappullu atortunik attorneqartariaqanngitsunik (soorlu qaammaqqutinut maluginiutilinnik, kuuffinnut assammik attoqqaarneqartariaqanngitsunik, matunut namminneq ammarlutilluunniit ikusik atorlugu ammarneqarsinnaasunut, akiliisarfinnut attoqqaartariaqanngitsunut il.il.)
  • Akulikitsumik peqqissaartumillu kikkunnit tamanit attorneqartartut eqqiarneqartassapput, ullormut ikinnerpaamik ataasiarlutik pulaartullu akulikinneranni akulikinnerusumik.
  • Inummut ataatsimut nerisassatut naatsorsuilluni sassaallerneq, nammineq atortorisat imaluunniit ataasiaannarluni atortakkat atorneqassapput
  • Atortussat ikiuutissallu tamanit atorneqartartut sullitap, atuisup assigisaasalu tulliisa atunnginneranni tamatigut eqqiarneqartassapput, imaluunniit nammineq pigisat ataasiaannarlutilluunniit atorneqarsinnaasut atorneqartassapput.
  • Atortut atuisup ataatsip atuereerneratigut eqqiarneqartuarsinnaanngitsut atornaveersaarneqassapput, soorlu oqarasuaatit, tabletit il.il.
  • Eqqaaviit ulikkaavinnginneranni ullut tamaasa imaarneqartassapput.
  • Atisanik errorsinermi errorsinissamut ilitsersuutit atisaniittut malinneqassapput, najugaqatigiilli coronavirusimik tunillatsissimasortaqarpata allarutit, oqorutit qalii iluatigullu atisat minnerpaamik 60 gradimi errorsisoqartassaaq. Annoraamerngit kuseriarnernut aniatinneqartunullu qinngamit pisunut attuunnissaminnut ilimanaateqarnerit, soorlu qungasequtit aaqqatillu, akulikinnerusumik errorneqartarnissaat isumaliutigineqassaaq.

Silaannarissaatit silaannarissaasarnerlu illup iluaniitillutit coronavirusip tuniluunnissaanut annikillisaaqataasinnaapput. Silaannarissarfiit, igalaat matuluunniit aqqutigalugit silaannaq taarseraatsinneqarsinnaavoq.

Coronavirus nutaaq attaveqarnikkut kuseriarneeqqatigullu virusilitsigut inummiit inummut tuniluuttarpoq – tangajornikkut, quersornikkut, oqaloqatigiinnikkut assigisaatigulluunniit Inuk assersuutigalugu quersorpat tangajorpalluunniit kuseriarneeqqat amerlanersaat nunamut tussapput, kuseriarneeqqalli kuseriarnimineeqqanik taaneqarsinnaasut, sivisulaartumik silaannarmiiginnartarput tunillaassuutitseriaannaallutik.

Illup ilua silaannarissarluarneqanngippat tuniluunneq silaannakkut ingerlasinnaavoq kuseriarneeqqat amerlanerulerlutik imminnut qaninnerulissammata. Silaannaap taarserneratigut kuseriarnimineeqqat ikilisinneqassapput, taamaattumillu silaannarissaanissaq noqqoruutsitsinissarlu tuniluunnissamik pinaveersaartitsinertut innersuussutaavoq pingaarutilik.

Ima silaannarissaassaatit:

  • Illumi igalaat matullu illugiinni ammarlugit noqqoruutsitsigit.
  • Ullormut 4-5-riarlutit 5-10 minutsit noqqoruutsitsisarit
  • Illup iluani isersimasut arlaliugussi akulikitsumik silaannarissaasarit assersuutigalugu pulaartoqannginnermi pulaartoqareernermilu.
  • Inimi ataatsimi piffissami sivisuumi isersimasut arlaliugussi nalunaaqutaq akunnikkaarlugu silaannarissarlugu noqqorutsitsisaritsi.

Silaannarissaaneq pingaartuuvoq, tuniluutsitsinaveersaarnermilu innersuussutinut taarsiutaanngilaq.