Inuusuttunut samminerusoq

Qanoq ilillutit tuniluunnermik annikillisaaqataasinnaanerlutit eqqarsaatigissallugu pingaaruteqarpoq, tuniluunnerullu aqunneqarsinnaajuarnissaa peqataaffigalugu. Nalinginnaasumiit peqatigisartakkavut tamatta ikinnerutissagigut kaammattuutaavoq.  Nakorsaaneqarfimmiit siunnersuutit tallimat eqqaamassagakkit pingaaruteqarpoq. Taamaalillutit imminut paarilluassaatit allallu paarilluassallugit.

Ulluinnarni atorsinnaasatit siunnersuutissaqqissut aaku:

1. Ikinngutinik peqateqarneq

Allanik peqateqarnikkut coronavirusip inuppasuarnut tuniluussinnaaneranut annertusaaqataassaatit. Taamaammat ilagisartakkatit killilersimaakkit, ataatsimoornermi amerlassutsit ataatsimoornerullu sivisussusaa inuillu assigiinngitsut qassiunersut eqqarsaatigalugit. Ersiuteqanngikkaluarluniluunniit sianiginagu tunillaassuisoortoqarsinnaavoq. Taamatulli ippoq aamma tunillatsitsimanani paasisimagaluaraanniluunniit, siornatigut tunillatsinnikuusimagaanni akiuussuserneqarsimagaluaraanniluunniit. Takorpiarneq ajukkatit assersuutigalugu sianerfigalugit allaffigalugilluunniit attaveqarfigisakkit.

2. Timigissarneq

Qanimut attaveqarfiusinnaasut tuniluunnissamut qaninnerulersitsisarput, assersuutigalugu timigissartarfinni atortutigut inuit amerlasuut atortagaanni.

Siunnersuutitsialaat:

  • Ajornanngippat silami timigissartarit.
  • Nammineq atortuutitit sapinngisamik atukkit.
  • Atortut aamma allanit atorneqartartut spritimik salilluartakkit.
  • Imertarfinnik avitseqateqartarnak.
  • Timigissarneq sioqqullugu kingornalu errortorit spritiluunniit atoruk. Tamanna pingaartuuvoq, timigissartarfimmiikkaanni holdikkaarluniluunniit timersoraanni.


3. Naapeqateqartarneq atoqatigiinnerlu

Coronavirus kuseriarneeqqakkut qanimut attaveqarnermi tunillaattarpoq, assersuutigalugu kunissinikkut.

Siunnersuutitsialaat:

  • Aatsaat COVID-19-imik ersiuteqanngikkuit, tunillatsissimannginnerit paasisimagukku tunillatsissimasumilluunniit qanimut attaveqarsimanngikkuit naapitaqarit atoqateqarilluunniit.
  • Sapinngisannik aalajangersimasumik atoqateqartarit imaluunniit sapinngisamik assigiinngitsunik ikittunguanik.
  • Eqqaamallugu assavit errortorluartarnissaat!

4. Immissinnut paarigitsi

Imminut illersornissat eqqaamaguk. Taamaalillutit inuit avatangiisitit illersorluarsinnaassavatit – aamma inuit COVID-19-imik peruluuteqarnissaminnut ernumanaatillit.

5. Aarleriguit

Piffissami uani inuusuttut imaannaanngitsorsiorsimapput. Inuit ilaat kiserliorsimapput ilaallu isumaalunnerusimallutik – immaqami allaat ernumavallaalersimallutik.