NUTARTIGAQ: (Pisortat angallassissutaanik angalassatilluni kapitissimanissamik piumasaaqaat juulip 23-ani unnup qeqqata tungaanut taamaallaat atuuppoq) Naalakkersuisut killilersuigallarnerit pillugit nalunaarutaat Nunarput tamakkerlugu atuuttoq 20. - 30. juulimut sivitsussallugu juulip 19-iani aalajangerput.
Nuummi tunillatsissimasut marlunnik ilasimasut kisitsisit kingulliit takutippaat. Tunillatsissimasut tamarmik juulip 19-iani misissuinermi nassaarineqarput.
Nuummi Misissuivik ulluni makkunani ulapaarfiungaatsiarpoq. Ataasinngormat tunuleriaattut akunnerpassuit atorlugit nikorfasariaqarsimapput, misissuiviullu ullormut suliarisinnaasai nallerneqarmata utoqqisorpassut ingerlaqqusaaginnartariaqarsimallutik.
Misiligutit Atammimmeersut tamarmik tunillatsittoqarsimannginneranik inerneqarput.
Nuummi tunillatsittut sisamanik ilaqqittut arfininngorneq unnugaa paasineqarput, taakkulu sapaammi pingasunik ilaqqipput. Taamaasilluni Nuummi tunillatsissimasut katillugit quliulerlutik. Tunillatsittoq ataaseq tunilluunnerit ilisimaneqartuninngaanniinngillaq, tunillatsissimasut pingasut allat suminngaanniit tunillatsissimanersut paasiniarneqaleruttorpoq. Tamanna Nuummi tunillaassuuttoqarneranik takussusiivoq.
Ippassaq unnukkut Nuummi innuttaasut marluk covid-19-imik tunillatsissimasut paasineqareersullu suli tunillaassuunnerup pilerfia paasineqanngilaq. Tamarmik Nuummi tunillatsissimanissaat ilimanaateqarpoq, tunillatsissimasullu aappaa Atammimmut Kangaamiunullu angalasimavoq.
Tallimanngornermi Qaqortumi inuk ataaseq covid-19-imik tunillatsissimasoq siumorneqarpoq. Pineqartoq tunillatsisimasut allat assigalugit juulip arfineq-sisamaani Rockhousemiissimavoq, taamaattorli ulluni kingullerni tunillatsisimasut attaveqarfigisimanngilai.
Sarfaq Ittummi ilaasut misissorneqarneri kingulliit tunillatsittoqarsimanngitsoq takutipaat. Tamanna isumaqarpoq Sarfaq Ittummut ilaallutik angalasut apuuffissaminnut pigunik angerlarsimaannartariaaruttut, umiarsuullu pilersaarutaasumik angalanera nangeqqinneqarpoq.
Tunillatsissimasumut qanimut attaveqarsimagaanni ullut arfineq-marluk angerlarsimaannassapput. Taava ullut arfineq-aappassaanni PCR atorlugu misissorteqqissapput, tunillatsissimanngikkaanni angerlarsimaannaqqusaaneq atorunnaarsinnaavoq.
Innuttaasut 440-t ippassaq Nuummi kapitikkiartorsimapput, nakorsaanerup tamanna nuannaarutigaa ullorlu iluatsilluartutut nalilerlugu.
Showing 151 to 160 of 185 results