Covid-19-imik tunillaassuuttoqarneranut Kalaallit Nunaanni periusissiaq
Kalaallit Nunaat qeqertaavoq tikissallugu amerlanngitsuinnarnik periarfissaqarfiusoq aamma illoqarfinni nunaqarfinnilu imminnut ungasissuni najugaqartunik inulik Taamaattumik tunillaassuunnerup siaruarnissaata pinaveersaartinnissaanut iliuusissanik sunniuteqarluinnarsinnaasunik pilersitsinissamut immikkut illuinnartumik periarfissaqarpoq. Periusissami tamanna aallaavigineqarpoq.
Pingaarnertut periusissiaq
Kalaallit Nunaanni pingaarnertut periusissiaalluni inuiaqatigiinni tuniluunnerup siammatsaalineqarnissaa.
Periusissami anguniakkat pingaarnerit tassaapput:
- Peqqissutsikkut amerlasuut napparsimalernerannik toqunerannillu kinguneqartussat pinaveersaartinneqassapput.
- Peqqinnissaqarfiup nalinginnaasumik ingerlaannarnissaa aammalu sulianik nalinginnaasunik attassiinnarnissaa taamaalillunilu innuttaasut peqqissusaannut iluaqutaanissaa pillugit annertunerusumik artukkernissaa pinaveersaartinneqassaaq.
- Inuiaqatigiinni annertuumik pisariaqartinneqartut annertuunik aningaasartuuteqarfiusussamik matuneqarnissaat pinaveersaartinneqassaaq. Taamaaliornikkut inuiaqatigiit aaqqissuussaaneranni pingaarutillit tamaasa, soorlu ilinniartitaanermut suliassaqarfiup ingerlaannarnissaat qulakkeerneqassaaq. Inuussutissarsiornermi pingaarnerpaaq taamatuttaaq ingerlatiinnarneqarsinnaassaaq.
Anguniakkat aalajangersimasut tassaapput:
Periusissiami anguniagassat sukumiisut ukuupput:
- Kalaallit Nunaanni tunillatsissimasunik peqalernissaata pinaveersaartinnissaa.
- Nunami siaruaattoqalerpat – annertunerusumik siaruaannissaa pinaveersaartinneqassaaq.
- Kalaallit Nunaanni ataatsikkut sumiiffinni arlalinni tunillaassuuttoqalivinnissaata pinaveersaartinnissaa.
Kingullermik nutarterneqarpoq