Akiuussuserneqarneq isissutaasarpoq

Sisimiuni Nuummilu tamanit iserfigineqarsinnaasuni isersimaniaraanni COVID-19-imut akiuussuserneqarsimanissaq piumasaqaataavoq.

Sisimiuni Nuummilu piumasaqaatit pillugit paasissutissat atuarneqarsinnaapput:

COVID-19-imut akiuussutissanik tamakkiisumik kapitissimasussaavutit

COVID-19-imut akiuussutissanik tamakkiisumik kapitissimanngikkuit, ukununnga iseqqusaanngilatit:

1) Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.

2) Kulturikkut sullissiviit, taakkununnga ilaatigut kulturip illorsui, filmertarfiit, katersugaasiviit saqqummersitsisarfiillu ilanngullugit.

4) Atuakkanik atorniartarfiit.

5) Silami aamma illup iluani timersortarfiit – taakkununnga init inersuillu eqaarsaartarfiit, nalunnarfiit, timigissartarfiit arsartarfiillu ilanngullugit.

6) Nujalerisut, tagiartuisartut, pinnersaasarfiit assigisaallu.

Qanoq ilinerani akiuussutissanik kapuinermi naammassinnittoqarsimasarpa?

Inuk COVID-19-imut akiuussutissanik kapuinermi naammassinnissimasutut isigineqassaaq, inuk akiuussutissamik kingullermik kapitissimappat. Kapitinninni akiuussutissap atorneqartup suunera apeqqutaatillugu kapitinnissat assigiinngitsunik amerlassuseqarput. Akiuussutissaq Moderna atorlugu kapitissimaguit, aappassaannik kapitinninni akiuussutissanik kapuinermi naammassinnissaatit.

Coronatest positiviusoq, ullut 14-iniit sapaatit akunneri 12-nut pisoqaassusilik, uppernarsaatitut atorneqarsinnaavoq.

Kikkut sumiiffinnut killilersuiffiusunut COVID-19-imut akiuussutissanik kapuinermi naammassinnissimanngikkaluarlutik isersinnaappat?

1) Sulisut suliffeqarfimmiillutik suliassaminnik isumaginnittussat.

2) Inuit Nakorsaaneqarfimmit COVID-19-imut akiuussutissamik kapitinnissamut innersuunneqanngitsut.

3) Inuit 11-inik ukiullit inuusunnerusulluunniit.

COVID-19-imut akiuussutissanik kapuinermi naammassinnissimanngikkaluaruilluunniit  sumiiffinnut ukununnga isersinnaavutit:

1) Pisiniarfiit

2) Allakkerisarfiit.

3) Mittarfiit.

4) Pisortani oqartussaasuni aamma suliffeqarfinni pilersuiviusuni init sullissiviit, kiffartuussinermi saaffiginnittarfiit il.il.

5) Assartuutinut tamanit atorneqartunut utaqqisarfiit.

Nalunaarut ukununnga atuutinngilaq

1. Kalaallit Nunaanni Peqqinnissaqarfik nalunaarummut ilaatinneqanngilluinnarpoq, kisiannili tamatigut napparsimasut peqqissusaannik qulakkeeriniarluni namminneerlutik maleruagassiorsinnaavoq. Aamma nakorsiartarfiit, suliffiit niuertarfiilluunniit namminersortut, peqqissaasutut akuerisanit ingerlanneqartut atorfigineqartulluunniit ilaatinneqanngillat.

2. Politikkikkut katersuunnerit aamma ilaatinneqanngillat, taamatullu politiit sulineri nalunaarummut ilaatinneqanngillat.

3. Ulluunerani neqeroorutini namminersortunit pisortanilluunniit pigineqartuni, atuarfinni, ilinniarfinni paaqqutarinniffinnilu isersimanermi akiuussutissanik kapuinermi naammassinnissimanissaq piumasaqaataanngilaq.

Kapitissimanissamut piumasaqaat assartuussinermut atuuppa?

Naamik.

Qanoq ilinerani uppernarsaat atorsinnaaviuk

Innuttaasut coronapas-imik akiuussutissamilluunniit kapitissimanermut uppernarsaammik nassarnissaat piumasaqaataanngilaq. Politiit Peqqinnissaqarfimmut inuit akiuussutissanik kapitissimanerannut paasissutissanik piniarsinnaapput, taamaalillutillu misissuisinnaallutik.

Tamakkiisumik kapitissimanermik misissuisarneq

Nalunaarut malinneqarnersoq pillugu misissuinissamut politiit qulakkeerisussaapput. Pisiniarfiutillit, sassaallertarfinni sulisut il.il. misissuinissamut pisussaaffilerneqanngillat. Misissuisoqarnerani innuttaasut politiit kapitissimanermut paasissutissanik peqqinnissaqarfimmut pissarsiniarnissaannut akuersissummik tunisussaavaat, taamaattumillu uppernarsaammik tigummiaqarnissaq pisariaqanngilaq.

Nalunaarut naapertorlugu maleruagassanik unioqqutitsineq pinerlunneruvoq. Pissuseq pineqartoq pineqaatissiiffiussappat akiliisussanngortitsisoqarsinnaavoq.