Tunillatsissimanermut uppernarsaat – atorfissaqartinnerit apeqqusernarpoq

Kingullermik nutarterneqarpoq

Tunillatsissimanermut uppernarsaatit tunniunneqarnissaannut Coronamik Akiuinermi suliaqarneq suli piffissamik atuiffigineqangaatsiarpoq, taamaattorli piumasuniit uppernarsaat atorfissaqartinneqarnerata ilimanassussaa annikippoq. Tunillatsissimanermut uppernarsaat Kalaallit Nunaanni Qallunaat Nunaannilu atorfissaqanngilaq. Tunillatsissimanermut uppernarsaat aatsaat atorfissaqalertarpoq qaammatit pingasut kingulliit iluanni tunillatsissimagaanni nunanullu allanut angalassagaanni. Uppernarsaat taamaallaat atorneqartarpoq nunani allani tikinnermi PCR-imik misissorneqarsimanissamik piumasaqaateqarfiusuni, soorlu USA-mi.

Taamaallaat PCR-imik misissorneqarsimasunut

Innuttaasut amerlasuut nammineerlutik imminnut misissorsimasut tunillatsissimanermut uppernarsaammik qinnuteqarsimapput. Taakku itigartinneqarumaarput. Tunillatsissimanermut uppernarsaammik pisinnaasut tassaapput Kalaallit Nunaata peqqinnissaqarfianiit PCR atorlugu misissorneqarsimasut. Nunamut allamut angalassuguit, tikiffissallu tunillatsissimanermut uppernarsaammik takutitsinissamik piumasaqaateqarpat, kisiannilu antigentestimik tamaallaat misissorsimallutit, taava aallannginninni ullut 14-it sioqqullugit PCR-imik misissorneqarnissat siunnersuutigineqarpoq.