airplanebooksbriefcase business cogs cross election entertainment fish house law lockmedicalpeopleselfservices socialtax

Covid-19-imut akiuussutissamik kapitinnissamut neqeroorut

Coronavirusimik tunillanneqarsimatilluni COVID-19-imut akiuussutissamik kapitissimaneq timip akiuunnissaanut iluaqutaassaaq.

2021-mi ukiarnissaata tungaanut innuttaasut 18-ileereersimasut, naartunngitsut milutsitsinngitsullu, tamarmik COVID-19-imut akiuussutissamik kapineqarnissaminnut neqeroorfigineqassapput.

Taamaattumik maannangaaq illit COVID-19-imut akiuussutissamik kapitinnissamut neqeroorfigineqaruit akuersinissannik eqqarsaatiginnereernissat pingaaruteqarpoq.

Akiuussutissaq akeqanngilaq piumasunullu neqeroorutaalluni.
Timinni COVID-19-imut akiuussutissaqalerneq

Coronavirus/(SARS-CoV-2) tassaavoq nualluut inunni nutaajusoq. Taamaattumik timerput taassuminnga napparsimalernissamut tunillatsinnissaminullu akiuussinnaanngilaq. Inuit ilaat coronavirusimik tunillanneqarsimasut napparsimallutik perululersinnaapput toqqutigisinnaallugulu.

Akiuussutissap COVID-19-imik napparsimarululernissannut illersussavaatit. Akiuussutissamillu kapitinnikkut inuiaqatigiinni tuniluuttoqaratarsinnaanerata ilimanassusianik apparsaaqataassaatit. Pingaaruteqarpoq amerlanerussuteqartut akiuussuserneqarniarlutik aalajangernissaat, taamaaliornikkummi tuniluuttoqarnissaa pinaveersaarneqassaaq.

Akiuussutissamik kapitikkuit timivit akiuussutissai sulillualersinneqassapput. Timinni akiuussutissat coronavirusimut antistoffit pilersittarpai.

Kingorna coronavirusimik tunillanneqaruit, timivit akiuussutissaasa virusi ilisaripallassinnaassavaat.

Timivit akiuussutissaasa coronavirusi ilisarigunikku antistoffiliussapput napparsimarululernissannut ilimanannginnerulersitsisunik.

Akiuussutissat EU-mit akuerineqarsimasut

Akiuussutissat nunatsinni neqeroorutigineqartut tamarmik EU-mi akuersinissamut misilittaaqqissaarnikkut periuseq atorlugu akuerisaapput.

Akiuussutissat EU-mit akuerineqarsimasut tassaapput:


Akiuussutissanik Pfizerimik Modernamilluunniit marloriarlutit kapitissimaguit, 95 %-imik illersorneqalissaatit.

COVID-19-imik napparsimalersinnaaneq akiuussutissap appartissavaa.
Akiuussutissat qanoq sivisutigisumik atuutissanerinut tunngatillugu suli uppernarsaateqanngilaq.

Malugiuk
Maanna nunarput taamaallaat akiuussutissamik Pfizer/BioNTech (Comirnaty)-mik aamma Moderna tigusaqarsimavoq.

 Akiuussutissap Pfizer/BioNTech isumaginissaa, assartornissaa uninngatinnissaalu pisariuvoq akiuussutissaq -70 gradit -80 gradillu akornanni uninngatinneqartariaqarmat. Taamaattumik akiuussutissaq najugaqarfinni assartuiffiusinnaasuni taamaallaat maanna neqeroorutigineqarsimavoq.


Akiuussutissat alla, Moderna, isumagiuminarnerujussuupput uninngasuutigiuminarnerullutillu. Taannaavorlu akiuussutissamik kapuuinermi maanna atorneqartoq.

Nunatsinni akiuussutissaq Pfizer aamma Moderna atorneqarpoq

Akiuussutissaq Moderna nunatsinni maanna akiuussutissamut kapuuinermut atorneqarpoq, siulianilu akiuussutissaq Pfizer atorneqarsimalluni.

Akiuussutissat Pfizer aamma Moderna RNA-akiuussutissamik (RNA-vaccine) taaneqartarput. 

RNA tassaavoq timitta celliini signalstofimik taaneqartartoq, taannalu proteininik pilersitsinissamut ”kode”-qarpoq. RNA-akiuussutissaq cellivit proteiniliorsinnaalernissaannut aalajangersimasunik kodeqarpoq. Proteini cellimi pilersinneqarpat timivit akiuussutissai antistoffiliorlutik aallartissapput, taamaalillutillu napparsimalernissannut illersulissavaatsit coronavirusimik tunillatsissimassagaluaruit.

Akiuussutissaq Pfizer imaluunniit Moderna coronavirusimik akoqanngilaq DNA-rnullu sunniuteqarnaviarani.

Akiuussutissamik kapineqarnissat amerlassusiat

Akiuussutissap sunniutissai pitsaanerpaaffianiitinniarlugit sapaatit-akunneri pingasut arfinillillu ingerlanerini marloriarlutit akiuussutissamik kapitissaatit.

COVID-19-imut akiuussutissat kingunerluutaat

Akiuussutissat tamarmik kingunerluuteqartarput, COVID-19-imut akiuussutissat taamaattuttaaq ipput.

Ajoqutaasinnaasut ataatsimut isigalugit sakkortunngillat qaangiutipallattarlutillu.

Peqqissutsimut oqartussat akiuussutissat EU-mit akuerisat isumannaatsutut isigaat uppernarsaatissaqarluarlutillu.

Kingunerluutit nalinginnaasut tassaapput:

  • Qasuneq
  • Niaqorlunneq
  • Nukikkut naggussakkullu anniarneq
  • Uulinnerit
  • Kissarneqalaarneq
  • Kapitiffiup nalaagut ippigusunneq, aappillertooqqaneq pullattoornerlu


Ataatsimut isigisalugu tassaavoq timivit akiuussutissaasa akiuussutissamik kapitinnermut qiusariarnera.

Qaqutigoortumik sapigaqarnermik qisuariartoqarujussuarsinnaavoq, assersuutigalugu akiuussutissap akuisa sapernerisigut.

Nakorsaatinik sakkortuumik sapigaqarlutit nalunngikkukku inummut akiuussutissamik kapisisussamut ilisimatitsissutigissavat.

COVID-19-imut akiuussutissamik kapitinnissamut atatillugu sapigaqarnermik qisuariaatit qaqutigoortut isumaginissaannut piareersimasoqartuaannarumaarpoq.

Kikkut akiuussutissalerneqarnissamut neqeroorfigineqassanersut

Siunissaq ungasinnerusoq eqqarsaatigalugu inuttaasut 18-ileereersimasut COVID-19-imut akiuussutissamik kapitinnissaminnut neqeroorfigineqassapput.

Meeqqat, naartusut milutsitsisullu akiuussutissamik neqeroorfigineqassanngillat. Tamatumunnga peqqutaavoq akiuussutissat suli inunnut taakkununnga misilittaavigineqarneri naammanngimmata.

Pingaarnersiuineq
Massakkuugallartoq akiuussutissat nunatta pissarsiarisartagaasa amerlassusiat killeqarpoq. Taamaattumik akiuussutissalersuinerit pingaarnersiuinikkut neqeroorutigineqassapput, taakkulu peqqinnissaqarfimmit nalilersuinerit naapertorlugit oqartussat aalajangersassavaat.


Malugiuk
Akiuussutissamik kapitereersimagaluarluni tunillaasinnaaneq pillugu ilisimasat amerlanngillat.

Akiuussutissamik kapitereersimagaluarlutilluunniit inunnut qanillinaveersaarnissat eqqiluisaarnissallu suli pingaaruteqarpoq, taamaaliornikkut coronavirusip inunnut allanut siaruaannissaa pinngitsoortissinnaagakku.

Qaqugu qanorlu akiuussutissamik kapitittoqarsinnaaneranut neqeroornissamut piffissaliineq

Qaqugu
Akiuussutissamik kapitissinnaalernissat pingaarnersiuinikkut neqeroorutigineqassapput innuttaasut sanngiinnerit qanimullu sullissisut illersorluarniarlugit.

Piffissap ingerlanerani nunatsinni innuttaasut tamarmik akiuussutissalerneqarnissaminnut akuerineqarsimasut akiuussutissamik kapitinnissaminnut neqeroorfigineqassapput.

Akiuussutissat kapuutit nunatsinnut tikiunneqariaraangata ingerlaannaq atorneqartarput.

Qanoq
Illoqarfigisanni neqeroorutaalerpat tamanut nalunaarutigineqarumaarpoq.

Neqeroorummut itigartitsineq

Peqqinnissamut oqartussat siunnersuutigivaat, akiuussutissalerneqarnissamut siullermeersumik neqeroorfigineqaruit akuerissagit.

Akiuussutissat kapuutit illoqarfigisannut nunaqarfigisannulluunniit tikinnerani akiuussutissamik kapitinnissannut neqeroorfigitinnerit itigartikkukku akiuussutissat illoqarfigisanni nunaqarfigisanniluunniit paarineqarsinnaanngimmata qulakkeersinnaanngilat kingusinnerusukkut akiuussutissamik kapitissinnaanerit.

Akiuussutissamik kapitinnissannut neqeroorfigitineqarnerit itigartikkukku kapitinnissannut qaqugu tulliani periarfissaqaqqilersinnaanersutit oqaatigineqarsinnaanngilaq.

Malugiuk
Nunaqarfinni akiuussutissamik kapitissinnaaneq ataasiaannarluni neqeroorutigineqassaaq, taamaattumik kaammattuutigineqarpoq nunaqarfigisanni akiuussutissamik kapitinnissannut neqeroorfigineqaruit akuersissasutit.

Akiuussutissat pillugit paasissutissat allat

Nunatta Nakorsaaneqarfiata siunnersuutigaa akiuussutissat pillugit paasisaqarnerorusukkuit ilisimasat pisortaneersut tatiginartuneersullu atuassagitit COVID-19-imut akiuussutissamik kapineqarnissamut neqeroorut pillugu aalajangertinnak.

Akiuussutissat isumannaatsuunerinik akuerineqarnissaanullu periutsit pillugit paasissutissat nittartakkani ukunani atuarsinnaavatit:


Nutarterneqarpoq: 3. juni 2021