airplanebooksbriefcase business cogs cross election entertainment fish house law lockmedicalpeopleselfservices socialtax

Kalaallit Nunaanni akiuussutissat akuerineqarsimasut

Akiuussutissat assigiinngitsut marluk Kalaallit Nunaanni akuerisaapput. Amerlanerulersinnaappulli akiuussutissat amerlanerusut akuerineqarnerisigut.
Comirnaty®

COVID-19-imut akiuussutissaq akuerineqartoq siulleq Comirnaty®-mik ateqarpoq, tyskillu suliffeqarfiutaannit BioNTechimit Amerikamiut suliffeqarfiutaat Pfizer suleqatigalugu ineriartortinneqarsimalluni. Comirnaty®-t Kalaallit Nunaanni pissarsiarisimasavut Tysklandimi Belgiamilu fabrikkini suliaapput.

Comirnaty® akiuussutissaavoq mRNA-usoq 16-inillu amerlanerusunik ukiulinnut atorneqarsinnaasutut akuerisaasoq, taamaakkaluartoq naartusunut milutsitsisunullu atorneqarnissaa akuerisaanngilaq.

Comirnaty®-p sunniutigisartagaa 95 procentit missaanniippoq. Uunga iserlutit paasisaqarnerugit Hvor godt beskytter vaccinerne? (Akiuussutissat qanoq illersuilluartigippat?) sst.dk-imut ingerlaqqissaatit

COVID-19-imut akiuussutissaq Moderna®

Akiuussutissat aappaat, Danmarkimi atorneqarsinnaanerminut akuerisaasoq taamaalillunilu Kalaallit Nunaannissaaq akuerisaasoq, Amerikamiut suliffeqarfiutaannit Modernamit ineriartortitaavoq. COVID-19-imut akiuussutissaq Moderna® Schweizimi Spaniamilu fabrikkini suliaavoq.

COVID-19-imut akiuussutissaq Moderna® Comirnaty®-tulli akiuussutissaavoq mRNA-usoq, akiuussutissallu taakku marluk sunniuteqassusii isumannaassusiilu eqqarsaatigalugit assigeeqaat. Moderna® 18-init amerlanerusunik ukiulinnut atorneqarsinnaasutut akuerisaavoq, taamaakkaluartoq naartusunut milutsitsisunullu atorneqartussatut akuerisaanani.

COVID-19-imut akiuussutissap Moderna®-p sunniutigisartagaa 94 procentiuvoq. Uunga iserlutit paasisaqarnerugit Hvor godt beskytter vaccinerne? (Akiuussutissat qanoq illersuilluartigippat?) sst.dk-imut ingerlaqqissaatit

Kikkut sorlernik akiuussuserneqassappat?

Nakorsaaneqarfiup aalajangigassaraa kikkut akiuussutissanik sorlernik akiuussuserneqassanersut. Tassa sorlermik akiuussusertissalluni nammineq aalajangerneqarsinnaanngilaq. Tamatumunnga pissutaasut ilaatigut tassaapput akiuussutissanik killilimmik amerlassusilinnik pissarsisimanerput, akiuussutissallu taakku immikkut ittumik paarineqarlutillu isumagineqarnissaat.

Taamaattumik akiuussusersuinermi agguaaneq sukannersumik aqunneqartariaqarpoq. Taamaaliornikkut akiuussutissat asuliinnartinneqarnissaasa minnerpaaffianniitinneqarnissaat qulakkeerneqassaaq. Tamanna aamma Kalaallit Nunaanni meeqqanut akiuussusersuisarnermi allanillu akeqanngitsumik akiuussusersuisarnerni atuuppoq.

Nutarterneqarpoq: 23. marts 2021