airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-imut akiuussutissinneqareernermi kingunerluutit

Nappaammut akiuussutissinneqarnermi kingunerluuteqarsinnaaneq, soorlu kapitiffiup aappillernera, kissarneqarneq nukiillu ippinnarnerat nalinginnaavoq. Qaqutigut navianaatilinnik kingunerluuteqartoqarsinnaavortaaq. Akiuussutissat akuerineqarnissaat sioqqullugu, akuerineqarneranni tamatumalu kingorna isumannaatsuunissaat pisortat nakkutigeqqissaarpaat.
COVID-19-imut akiuussutissinneqarneq

COVID-19-imut akiuussutissinneqaruit tunillatsissinnaanerit napparsimalersinnaanerillu annikillissavat. Nakorsaatitut allatulli COVID-19-imut akiuussutissat kingunerluutitaqarsinnaapput. Taakku tassaagajupput kapitiffiup nalaata aappillernera ippinnarneralu, kiaqatsiarnerlu.

Akiuussutissaq akuerineqartinnagu inunnit tuusintilikkaanit peqataaffigineqartumik misilerarneqaqqaartarpoq. Nappaammut illersuutaanissaa kingunerluutaasinnaasullu ersiutinit imal. nappaammit akiuussutissiiffigisamit ajornerunnginnissaat, COVID-19-imut akiuussutissap akuerineqarsinnaanissaanut aalajangiisuussapput.

Akiuussutissinneqareeruit imaaliortariaqarputit

Akiuussutissinneqareernermi kingunerluutit annikitsut erniinnarlu qaangiuttartut nalinginnaasuupput amerlanertigullu navianaateqanngivillutik. Taakku tassaasinnaapput kapitiffiup nalaata aappillernera ippinnarneralu, kissarneqalaarneq nukiillu ippinnarnerat. Taamaattunik nalaataqaruit peqqissaavimmut saaffiginnittariaqanngilatit. Kissarneqalaalissaguit tamanna timitta nappaatinut akiuussinnaassusaata qisuariarneranut ersiutaavoq.

Navianaatilinnik kingunerluuteqaruit najukkanni peqqissaavik attavigiuk

Akerlianilli akiuussutissinneqareernerpit kingorna perulunnartunik ersiuteqaruit, najukkanni peqqissaavimmut attaveqartariaqarputit. Taakku tassaasinnaapput sapigaqarnikkut anernikilliorneq ammikkulluunniit aniornininneq. Ersiutaasut akiuussutissameersuunersut allamilluunniit patsiseqarsinnaanersut nakorsap naliliivigisinnaavaa.

Kingunerluutinik nalunaaruteqarnissaq najukkanni napparsimmaviup/peqqissaaviup pisussaaffigaa. Akiuussutissinneqarnerup kingunerluutitaanik ersiuteqarnerit nalornigukku napparsimmavik /peqqissaavik attavigisinnaavat.

Akiuussutissat nakkutigeqqissaarneqarput

COVID-19-imut akiuussutissaq pisarnermiit pilertornerusumik inerisarneqaraluaq uppernarsaatissartai pisarnertut sukumiisumik misissorneqarput. COVID-19-imut akiuussutissanik misileraanerit oqaluttuarisaanermi annertunerpaapput.

Inerisaanermi alloriarnerit ataatsikkut ingerlanneqarmata akiuussutissat pillugit misilittakkat tamakkiisut piffissaq nalinginnaasumit sivikinnerusoq atorlugu katersorneqarput. Naatsorsuutiginngisanik kingunerluuteqartoqarsinnaanngivisoq oqartoqarsinnaanngilaq, akiuussutissinneqareernerulli kingorna kingunerluutit tamangajammik sap. ak. arfinillit siulliit ingerlaneranni takkuttarnerat, kingusinnerusukkullu takkuttarnerisa qaqutigoorluinnartuunera akiuussutissanit allanit ilisimavarput.

Akiuussutissaq kingunerluutitaqarnerusinnaasoq paasinarsissappat qisuariartoqarsinnaaqqullugu, akiuussutissat akuerineqareerneranniit nakorsaatit pillugit oqartussaasut nakkutilleeqqissaarputtaaq. Kingunerluutit taakku tassaasinnaapput misileraanerni takuneqanngitsut imal. kingunerluutaasartutut ilisimaneqartut misileraanerniit akulikinnerusumik atugaasut.

Ilaatigut innuttaasunit peqqinnissakkullu sullissisuniit kingunerluutinik nalunaarutiginninnerit iluaqutsiullugit nakkutilliisoqarpoq.

COVID-19 -imut akiuussutissinneqareerninni kingunerluutit nammineq nalunaarutigikkit

Nunatsinni Nakorsaaneqarfik nunatsinni kingunerluutaasorisanik nakkutilliinermi peqataavoq.

COVID-19-imut akiuussutissinneqarnermut atatillugu kingunerluutit illit nammineq nalunaarutigisinnaavatit.

COVID-19-imut akiuussutissinneqareernerup kingorna kingunerluutit nalunaarutigikkit (sullissivik.gl-imut ingerlaqqissaatit)

Aamma atuarsinnaavat
Nutarterneqarpoq: 24. marts 2021