airplanebooksbriefcase business cogs cross election entertainment fish house law lockmedicalpeopleselfservices socialtax

Nunarput qimallugu angalasussat akiuussutissamik kapitissimanermut uppernarsaateqalersinnaanngorput

Nunarput qimallugu angalanissannik pilersaaruteqaruit, taava covid-19-imut akiuussutissamik kapitissimaninnut uppernarsaammik takussutissamillu tunineqarnissannut Corona pillugu Allattoqarfimmut noqqaassuteqarsinnaavutit.
4. juni 2021

Neqeroorut innuttaasunut ataasiarlutik tamakkiisumilluunniit covid-19-imut akiuussutissamik kapitinnikunut, aammalu assersuutigalugu Danmarkimiinnerminni uppernarsaateqarnissamik pisariaqartitsisunut atuuppoq.

Corona pillugu Allattoqarfimmit akiuussutissamik kapitissimanermut uppernarsaat ilaatigut Danmarkimi atorneqarsinnaassaaq, tassaassalluni akiuussutissamik kapitissimanermut takussutissaq.

Danmarkimi neriniartarfippassuarni, nuannaariartarfippassuarni takornariartarfippassuarnilu iserniaraanni akiuussutissamik kapitissimanermut uppernarsaateqarnissaq imaluunniit akunnerit 72-it iluini covid-19-imut misiligummik tigusiffigitissimaneq piumasaqaataapput. Danmarkimiinnerup nalaani Corona pillugu Allattoqarfimmit covid-19-imut akiuussutissamik kapitissimanermut uppernarsaat takussutissatut atorneqarsinnaassaaq.

Kalaallit Nunaanni neriniartarfinnukarniaraanni assigisaanulluunniit akiuussutissamik kapitissimanermut uppernarsaammik takutitsinissaq maanna piumasaqaataanngilaq.

Kalaallit Nunaanni akiuussutissamik kapitissimanermut uppernarsaatinut tunngatillugu, nunat assigiinngitsut akornanni oqartussaasunit akuerisamik ataavartumik aaqqiissuteqartoqarsinnaaneranik misissueqqissaarnissaq ingerlanneqaleruttorpoq. Taamannak aaqqiissuteqartoqarnissaata tungaanut akiuussutissamik kapitissimanermut uppernarsaammik tunniussisoqarsinnaassaaq.

Akiuussutissamik kapitissimanermut Corona pillugu Allattoqarfimmit uppernarsaat
Covid-19-imut akiuussutissamik kapitereeruit, akiuussutissamik kapitissimanermut uppernarsaammik tunineqarnissannut noqqaassuteqarsinnaavutit vaccinationsattest@nanoq.gl-imut allallutit noqqaassuteqarsinnaavutit, aqqit, inuttut normut maildressellu ilanngullugit paasissutissanik ilisimatitsiutigalutit. Tamatuma kingorna akiuussutissamik kapitissimaninnut uppernarsaat e-mail aqqutigalugu pdf-filitut ilinnut nassiunneqassaaq.

Akiuussutissamik kapitissimanermut uppernarsaammi paasissutissat tulliuttut allaqqajumaarput: Aqqit, inuttut normut, qasseriarluni kapitissimanerit akiuussutisserneqarninnullu killiffik kiisalu ilaatigut PCR-misissuummik misissortissimanerit. Uppernarsaat pdf-filitut illit mailinnut nassiunneqarumaarpoq.

Uppernarsaatip downloadernissaa anillatsinnissaalu isumassarsiatsialaavoq, taamaasilluni apeqqutigineqassappat takutissinnaajuaannarniassagakku.

Minnerpaamik ulluni 7-ini kiffartuunneqarnissamut piffissarititap sivisussuseqarnissaa naatsorsuutigineqarpoq.

Akiuussutissamik kapitissimanngikkuit Danmarkimilu sumiiffinni coronamut akiuussutissamik kapitissimanermut uppernarsaammik imaluunniit misiligummik tigutiffigitinnermi tunillatsissimannginnermik akissummik peqarnissamut piumasaqaateqarfiusuni Danmarkimi PCR-testimik aammalu Quicktestimik taaneqartartunik misissortipallattoqarsinnaavoq. Uppernarsaateqariaaseq taamaattoq misiligummik tigusiffigitereernermiit akunnerni 72-ini atuuttarpoq.

Coronapasimik atuinissamut danskit maanna maittarisassaataat atuuttut pillugit ugguuna atuarsinnaavutit: Coronapas - hvor og hvordan? https://coronasmitte.dk/raad-og-regler/coronapas