airplanebooksbriefcase business cogs cross election entertainment fish house law lockmedicalpeopleselfservices socialtax

Nappaammut ersiuteqaruit

COVID-19-imut ersiutaasinnaasunik ersiuteqaruit imminut mattusimalersissaatit, taamaaliornikkut allanik tunillaanissat pinaveersaartissagakku. Aamma PCR-imut misissortinnissat isumagissavat.
COVID-19-imut nalinginnaasumik ersiutaasartut suuppat?

COVID-19-imut nalinginnaasumik ersiutaasartut nappaammut ersiutaasartunut, ass. nuannermit nuallunnermillu, ilisimasavit assigaat:

  • Kissarneqarneq
  • Panertumik quersorneq
  • Anernikilliorneq
  • Qasoqqaneq
  • Mamassusersiuutaarunneq naamasaarunnerlu
  • Nukikkut anniarnerit
  • Toqqusaarlunneq


Ilaasa aamma ersiutit allat nalaassinnaavaat, soorlu meriannguneq, niaqorlunneq meriarnerlu.

Inummiit inummut ersiutit assigiinneq ajorput, ersiutillu, ass. kiaqarneq kiaqannginnerluunniit, COVID-19-imik napparsimalersimanermut qulakkeerinnissutaasinnaanngillat.

Nappaammut ersiutit qanoq iliuuseqarfigissavigit?

Nappaammut ersiuteqaruit COVID-19-imullu ersiutaanersut nalornissutigigukku misissortinnerpit kingornagut akissutisinissavit tungaanut coronavirusimik nutaamik tunillatsissimasutullusooq iliuuseqassaatit.

Taamaattumik:

  • Imminut mattusimatigit
  • Najukkanni peqqinnissaqarfimmut sianissaatit
  • Eqqiluisaarneq eqqiaasarnerlu eqqumaffigilluassavatit
  • PCR-imut misissortinnissat isumagissavat


Imminut mattusimatinninnit sivikitsumik anisariaqalissagaluaruit, ass. napparsimmaviliartariaqalissagaluaruit, qanermut assiaqut CE-mik nalunaaqutserneqarsimasoq atoruk.

Eqqaamassavat angallassissutit kikkunnit tamanit ilaaffigineqarsinnaasut ilaaffigeqqusaannginnakkit.

Qaqugu peqqinnissaqarfik attaveqarfigissaviuk?

Najukkanni peqqinnissaqarfik sianerfigissavat:

  • COVID-19-imut ersiuteqaruit napparsimasutullu misigiguit
  • Ernumaguit nalorniguilluunniit


Peqqinnissaqarfimmi sulisut piaartumik misissortikkiartussanersutit nalilersussavaat. Peqqinnissaqarfimmi sulisut misissortinnissat pisariaqartoq nalilerpassuk ullormi tassani misissortinnissannik neqeroorfigineqassaatit. Peqqinnissaqarfimmi sulisup qanoq sumilu misissortissasutit ilisimatitsissutigissavaa.

Akiuussusertissimallutit COVID-19-imut ersiuteqalissagaluaruit qanoq iliussavit

Akiuussusertissimagaluaruilluunniit akiuussusertissimannginnerpit nalaanisulli tuniluunnerup pinaveersaartinnissaanut innersuussutit malissavatit. Imminut mattusimassaatit, eqqiluisaarneq eqqiaanerlu eqqumaffigilluassavatit COVID-19-imullu ersiuteqaruit misissortinnissat isumagissallugu.

Tamanna akiuussutissat 100 procentimik sunniuteqannginnerannik pissuteqarpoq, taamaattumillu tamakkiisumik akiuussusertissimagaluaraanniluunniit COVID-19-imik tunillatsissinnaaneq napparsimasinnaanerlu annikitsumik ilimanaateqarpoq. Tamatuma saniatigut akiuussutissap akiuussusertissimasup tunillatsereernermigut ersiuteqanngikkaluarluni allanik tunillaasinnaanera pinaveersaartissinnaaneraa suli uppernarsarneqarsimanngilaq.

Aamma atuarsinnaavatit
Nutarterneqarpoq: 23. marts 2021