airplanebooksbriefcase business cogs cross election entertainment fish house law lockmedicalpeopleselfservices socialtax

Tunillatsissimasutit paasineqarpat

Coronavirusimik nutaamik tunillatsissimasutit paasineqarpat allanik tunillaanissat pinngitsoortinniarlugu erngerlutit angerlarsimallutit imminut mattusimatilissaatit. Tamanna aamma najugaqatinnut qanillinnginnissamik isumaqarpoq.
Imminut mattusimatinneq

Tunillatsissimasutit paasineqarpat – ersiuteqarnerit ersiuteqannginnerilluunniit apeqqutaatinnagu:

  • Erngerlutit imminut mattusimalersissaatit
  • Eqqiluisaarneq eqqiaanerlu eqqumaffigilluassavatit

Akissutisiassat qanoq pissarsiarissaviuk

Coronavirusimik nutaamik tunillatsissimasutit paasineqarpat Nunatta Nakorsaaneqarfianit sianerfigineqassaatit. Tamatuma saniatigut kikkut qanillisimaneritit, tassa imaappoq kikkut tunillassimasinnaaneritit, paasiniarneqassammat Corona pillugu allattoqarfimmit 24 tiimit qaangiutsinnagit sianerfigineqassaatit.

Tunillanneqarsimatillutit angalanerit

Eqqaamassavat angallassissutit kikkunnit tamanit ilaaffigineqarsinnaasut ilaaffigeqqusaannginnakkit.

Qanermut assiaqummik atuineq

Imminut mattusimatinninnit sivikitsumik anisariaqalissagaluaruit, ass. napparsimmaviliartariaqalissagaluaruit, qanermut assiaqut CE-mik nalunaaqutserneqarsimasoq atoruk.

Uani paasisaqarnerugit: ”Qanermut assiaqut atoruk”

Qaqugu imminut mattusimajunnaassavit?

Nappaammut ersiuteqarnermi
Nappaammut ersiutaarunnermit ullut unnuallu pingasut qaangiuppata napparsimajunnaarsimasutut imminullu mattusimajunnaarsissinnaasutut nalilerneqassaatit. Aamma ullut qulit qaangiunneranni malunnartumik peqqinnerulersimaguit kingunerluutillu, soorlu mamassusersiuutaarunneq, naamasaarunneq, quersorneq, niaqorlunneq, qasoqqaneq il.il., sakkukinnerusumik atorukkit imminut mattusimatinnerit unitsissinnaavat. Taamaattoq piumasaqaataavoq ulluni unnuanilu pingasuni (nipaallisaatit kissarnermik appartitsisartut, soorlu paracetamolit atornagit) kissarneqarsimannginnissat.

Timit akiuussutissakippat ullut 20-t qaangiuppata, ulluni unnuanilu pingasuni kissarneqarsimanngikkuit, imminut mattusimatinnerit unitsissinnaavat.

Nappaammut ersiuteqannginnermi
Nappaammut ersiuteqanngikkuit ullut unnuallu qulit qaangiuppata imminut mattusimanerit unitsissinnaavat misissortinnerpit kingornagut napparsimajunnaarsimasutit paasineqarsimappat.

Akiuussusertissimaguit

Akiuussusertissimagaluaruilluunniit akiuussusertissimannginnerpit nalaanisulli tuniluunnerup pinaveersaartinnissaanut innersuussutit malissavatit.

Imminut mattusimatissaatit, eqqiluisaarneq eqqiaanerlu eqqumaffigilluassavatit kikkunnullu qanillisimaninnik paasisaqartoqarnissaa isumagissallugu. Tamanna akiuussutissat 100 procentimik sunniuteqannginnerannik pissuteqarpoq, taamaattumillu tamakkiisumik akiuussusertissimagaluaraanniluunniit COVID-19-imik tunillatsissinnaaneq napparsimasinnaanerlu annikitsumik ilimanaateqarpoq.

Tamatuma saniatigut akiuussutissap akiuussusertissimasup tunillatsereernermigut ersiuteqanngikkaluarluni allanik tunillaasinnaanera pinaveersaartissinnaaneraa suli uppernarsarneqarsimanngilaq.

Aamma atuarsinnaavatit
Nutarterneqarpoq: 29. marts 2021