airplanebooksbriefcase business cogs cross election entertainment fish house law lockmedicalpeopleselfservices socialtax

Angerlarsimaannaqqusaaneq

Kalaallit Nunaannut angalasut imaluunniit COVID-19-imik tunillatsissimasunut qanillisaqarsimasut tamarmik ulluni 14-ini imaluunniit COVID-19-imut misissortinnerminni tunillatsissimanngitsutut nalunaarutigineqarnissamik tungaanut angerlarsimaannartussaapput. Angerlarsimaannaqqusaanermi siunertaavoq inuiaqatigiinni tuniluuttoqalernissaanut illersuinissaq.
Angerlarsimaannaqqusaaneq

Angerlarsimaannassaatit:

  • Kalaallit Nunaannut tikikkuit. Eqqumaffigissavat illoqarfimmut sumut apuuttussaanerit apeqqutaalluni maleruagassat assigiinngitsuummata.
  • Imaluunniit inuit COVID-19-imik tunillatsissimasutut paasineqartut qanillisimagukkit.

Tunngaviusumik inassutigineqarpoq inissiami immikkoortumi angerlarsimaannarnissat. Tamanna pisinnaanngippat angalasup ullut tallimassaanni tunillatsissimannginnerata paasineqarnissaata tungaanut najugaqatigiit tamarmiusut angerlarsimaannarnissaat inassutigineqarpoq.

COVID-19-imik tunillatsissimasumut qanillisimaguit ulluni 14-ini imaluunniit tunillatsissimasinnaaffinnit ullut arfineq-aappaanni misissortinninni tunillatsisimannginnerpit paasineqarnissaata tungaanut angerlarsimaannassaatit.

Ersiuteqalernissaq immikkut eqqumaffigiuk:
  • Tikinninnit/tunillatsissimasinnaaffinnit ullut 14-it ingerlaneranni ersiuteqarnerlutit maluginiarluassavat.
  • COVID-19-imut ersiuteqaruit misissortinnissannut erngerlutit inniminniissaatit.

Ersiutit

Angerlarsimaannaqqusaaguit ersiutit uku immikkut eqqumaffigissavatit:

  • Panertumik quersorneq
  • Kissarneqarneq
  • Nukikkut anniarnerit
  • Anernikilliorneq
  • Toqqusaarlunneq
  • Mamassutsinik tipinillu malugisaqarsinnaajunnaarneq


Ersiutinik taamaattunik malugisaqaruit najukkanni peqqinnissaqarfimmut sianissaatit.

Angerlarsimaffimmi pissusilersornissamut innersuussutit

Innersuussutit malinneqarnissaat pingaaruteqarpoq. Angerlarsimaannaqqusaanermut aalajangersakkanik unioqqutitsineq pillaatitut akiliisitaanermik kinguneqarsinnaavoq. Taamaattumik angerlarsimaannaqqusaaninni:

  • Angerlarsimaannartariaqarputit. Suliartoqqusaanngilatit, atuariartoqqusaanngilatit ilinniarfigisannukaqqusaanalluunniit. Tamanna aamma nappaammut ersiuteqanngikkaluaruit napparsimasutulluunniit misigisimanngikkaluaruit atuuppoq.
  • Inunnut allanut minnerpaamik 2 meterinik ungasissuseqassaatit, aamma kunissinallu, eqitaarinallu timikkut attugaqassanngilatit.
  • Periarfissaappat kisimiillutit imaluunniit angalaqatigisimasatit ilagalugit angerlarsimaannassaatit. Tamannali pisinnaanngippat najugaqatinnik siniffeqateqassanngilatit sivisuumillu najugaqatinnut najuunnaveersaassallutit.
  • Pulaarniartunik itigartitsisassaatit.
  • Perusuersartarfik/uffarfik immikkoortoq atussavat. Inoqutigiinni perusuersartarfik/uffarfik ataasiinnaappat atorneqareeraangami spriterluarneqartassaaq.
  • Ullormut arlaleriarlutit illup ilua silaannarissartassavat.
  • Imermik qaqorsaammillu assatit errortorluartassavatit, minnerpaamik:
    • Perusuersartarfimmeereerninni
    • Nerereeraangavit
    • Nerileraangavit
    • Angerlaraangavit
    • Kakkissarfimmut tallivilluunniit peqiffianut quersoreeraangavit/tangajoreeraangavit
    • Eqqaavik anninnialeraangakku annisereeraangakkulu
    • Kisivillu atugassannik allaruteqassaatit

Angerlarsimaffiup/angerlarsimaannarfigeqqusaasup avataani pissusilersornissamut innersuussutit

Innersuussutit malinneqarnissaat pingaaruteqarpoq. Angerlarsimaannaqqusaanermut aalajangersakkanik unioqqutitsineq pillaatitut akiliisitaanermik kinguneqarsinnaavoq. Taamaattumik angerlarsimaannaqqusaaninni:

  • Inunnik tamanik angallassissutit atornaveersaakkit – taakkununnga taxat ilaapput
  • Angerlarsimaannarfigeqqusaasoq qimattariaqarukku
  • – soorlu misissortikkiartussaguit imaluunniit pisariaqartitannik pisiniartariaqaruit – qanermut assiaqummik atuissaatit.
  • Allanut qanillissanngilatit, soorlu qimminnik aneerussiguit.

Angerlarsimaannaqqusaanerup sivisussusia
  • Tikinninniit ullut tallimassaanni misissorteqqissaatit. Danmarkimiit Nuummukaruit Kastrupimi tunniussininni misissorteqqinnissamut piffissamik tunineqassaatit.
  • Nuup avataanukartut tamarmik najukkaminni peqqinnissaqarfimmut saaffiginnissapput ullut tallimassaanni misissortinnissamut piffissamik inniminniiniarlutik.
  • Misissortinninni tunillatsissimanngitsutit paasineqarpat angerlarsimaannaqqusaanerit unissaaq.
  • Misissortinnianngikkuit tikinninniit ulluni 14-ini angerlarsimaannassaatit.
  • COVID-19-imik tunillatsissimasumut qanillisimaguit ulluni 14-ini imaluunniit tunillatsissimasinnaaffinnit ullut arfineq-aappaanni misissortinninni tunillatsisimannginnerpit paasineqarnissaata tungaanut angerlarsimaannassaatit.

Angerlarsimaannarfigeqqusaasunut innersuussutit

Angerlarsimaannarfigisinnaasannik pissaqanngikkuit oqartussaasut immikkut iliuuseqarlutik aammalu pisuni immikkut ittuni angerlarsimaannarfigeqqusaasumut ikiuussinnaapput:

  1. Tamanna sioqqullugu nammineerlutit inissikkallarfissannik pissarsiniarsimaguit
  2. Nammineerlutit angalaguit, aammalu apuuffissanni najugaqarnermut uppernarsaammik takutitsisinnaaguit.
  3. Aamma § 12-imi aalajangersakkat peqqutigalugit illoqarfimmi apuuffissarinngisanni angerlarsimaannartussaaguit.
  4. Imaluunniit inissiap najukkavit killeqarnera peqqutigalugu ilaquttanniit immikkoorsinnaanak angerlarsimaannartussaatitaanerpit naammassinissaanut periarfissaqanngikkuit.


Takornariat sulinermullu atatillugu angalasut tunngaviusumik angerlarsimaannarfigeqqusaasunik atugassinneqartanngillat.

Qanillisaqarsimaneq

Inuk coronavirusimik tunillatsissimasutut paasineqartoq qanillisimagukku Corona pillugu allattoqarfimmiit attavigineqassaatit, aammalu tunillatsissimasumut kingullermeerlutit qanillininniit ulluni 14-ini angerlarsimaannaqqullutit qinnuigineqassallutit. Tamatuma kingorna tunillatsissimasinnaaffinnit ullut arfineq-aappanni misissortissaatit, aatsaallu misissortinninni tunillatsissimanngitsutit uppernarsineqarpat angerlarsimaannaqqusaanerit unissaaq.

Tunillatsissimasumut qanillisimasutut isigineqassaatit:

  • Inummik tunillatsissimasumik najugaqateqaruit.
  • Inuk tunillatsissimasoq attorsimagukku (soorlu eqinnikkut), imaluunniit inuup tunillatsissimasup timiminit aniatitai illersuuteqarnak attorsimagukkit (soorlu tunillatsissimasoq quersorsimappat tangajorsimappalluunniit, imaluunniit kakkissarfia qanermulluunniit assiaqutaa il.il. attorsimagukkit).
  • Minutsinit 15-init sivisunerusumik tunillatsissimasoq 1 meterit iluanni qanilleqqasimagukku (soorlu oqaloqatiginninnermi).
  • Minutsinit 15-init sivisunerusumik tunillatsissimasoq pisuni matuma kinguliani taaneqartuni 2 meterit iluanni qanilleqqasimagukku:
    • Pisut sakkortuumik anersaartorfiusut, soorlu erinarsorneq, nipituumik oqalunneq suaartarnerluunniit
    • Pisut timikkut assoroorfiusut, soorlu timigissarneq yogarnerluunniit
    • Inimi matoqqasumi silaannarissarluagaanngitsumi isersimaneq


Najugaqatitit najugaqataanerinnartik peqqutigalugu qanillineqarsimasutut taaneqassanngillat. Aatsaat misissortinninni tunillatsissimasutit paasineqarpat najugaqatitit qanillineqarsimasutut taaneqassapput, taakkulu angerlarsimaannartussanngussapput misissortittussanngussallutillu.

Eqqiaaneq errorsinerlu
  • Ullut tamaasa eqqiaanermut atortut nalinginnaasut atorlugit eqqiaasarnissaq innersuussutigineqarpoq.
  • Matut tigummiviisa, imermik kuutsitsiviit attorneqartartullu allat akulikitsumik spriterneqartarnissaat innersuussutigineqarpoq.
  • Eqqiaanermi ikiorteqartoqarpat eqqiaasut angerlarsimaffimmut iseqqusaanngillat.
  • Nammineerluni errorsiveqaraanni atisanik errorsinerit nalinginnaasumik ingerlanneqarsinnaapput.

Eqqagassalerineq

Eqqaasarneq nalinginnaasumik ingerlanneqassaaq.

Aamma atuarsinnaavat
Nutarterneqarpoq: 16. marts 2021