airplanebooksbriefcase business cogs cross election entertainment fish house law lockmedicalpeopleselfservices socialtax

Coronavirus nutaaq taamatut tuniluuttarpoq

Ilimanarpoq ersiutaasunik peqaruit tunillaanerusinnaasutit, kisianni aamma ersiutaasunik peqanngikkaluarlutit tunillaasinnaavutit.
Coronavirus nutaaq taamatut tuniluuttarpoq

Coronavirus nutaaq ilaatigut nuannertut nuallunnertullu tuniluuttarpoq virusip tunillatsissimasup anersaartuutaaniit inuup allap isaanut, sorluinut imaluunniit qarnganut periarfissat uku arlaatigut:

  • Kuseriarnikkut tunillaanneq
  • Attorneqarnikkut tunillaanneq

Kuseriarnikkut tunillaanneq

Inuk tunillatsissimasoq soorlu quersornikkut, tangajornikkut imaluunniit suaartarnikkut kuseriarnerit virusimik akullit siaruartersinnaavai. Kuseriarnerit taamatut silaannakkut avammut igeriussat inummit allamit najuunneqarsinnaapput taassumalu isaanut, sorluinut imaluunniit qarnganut pulallutik. Kuseriarnerit amerlanerpaat meterit ikittunnguit iluini nunamut nakkartarnissaat ilimagineqarpoq, ataatsimullu isigalugu kuseriarnikkut tuniluunnermik ulorianartorsiut imminnut ungasinniarnikkut pinaveersaartinneqarsinnaavoq.

Silaannaap taarsinnginnerata kuseriarnikkut tunillaanneq annertusisippaa, kuseriarnerit amerlanerulernerisut imminnullu qaninnerulernerisigut kuseriarnerillu silaannarmiinnerisa sivitsornerisigut. Taamaattumik ataatsimut isigalugu illup iluaniinneq tunillatsinnissamut annertunerusumik uloriarnartorsiorfiuvoq, assersuutigalugu inini mikisuni inuit amerlappata silaannarissarneqanngitsumilu sivisuumik isersimagaanni.

Attuinikkut tunillaanneq

Attuinikkut tunillaanneq toqqaannartumik toqqaannanngitsumillu attuinikkut pisinnaavoq.

Toqqaannartumik attuineq
Toqqaannartumik attuinikkut inuup tunillatsissimasup nammineq nuani imaluunniit kakkini assamminut tutsissinnaavaa, taamalu assersuutigalugu assammiinikkut inummut allamut ingerlateqqissinnaallugu. Taava inuup tulliuttup tunillaaneq nammineq ameraasaminut masattunut isiminiittunut, sorlumminiittunut imaluunniit qanerminiittunut nuussinnaavaa.

Toqqaannanngitsumik attuineq
Toqqaannanngitsumik attuinermi inuk tunillatsissimasoq quersornermigut, tangajornermigut imaluunniit suaarnermigut imaluunniit assannik minguttunik attuinermigut qaani virusimik nuussisinnaavoq, soorlu matut tigummiviini, majuartarfiit ungaluusaanni il.il. Taava inuup tulliata taakkuninnga attuisup tunillaanneq nammineq ameraasaminut masattunut isiminiittunut, sorlumminiittunut qanerminiittunullu ingerlatissavaa.

Malunniunnissaanut piffissap sivisussusaa

Erseqqissumik ilisimaneqanngilaq COVID-19-imik tunillatsissimasunit qanoq amerlatigisut tuniluuffikkut sorlikkut tunillanneqarsimanersut.

Tunillatsinnermiit nappaatip ersiutaasa takkunnerinut amerlasuutigut ullut 5-6 ingerlasarput, kisianni allanngorarsinnaapput ulloq ataatsimiit ullunut 14-inut. Piffissaq taanna aamma taaneqartarpoq ’inkubationstiden’ (tunillatsinnermiit ersiutaasa takuneqarsinnaalernerinut piffissaq).

COVID-19-imut pingaartumik maluginiarneqassaaq ersiutaasunik peqanngikkaluaraanniluuniit tunillaasinnaammat.

Ersiutaasut takkutinnginnerini tunillaanneq

Ilimagineqarluinnarpoq virusit amerlanerpaat aninneqartartut ersiutaasut ullormi takkuffiisa nalaani, kisianni ulluni siuliini virusit aninneqarsinnaasut taamalu allanik tunillaalluni, taanna taaneqartarpoq’’præsymptomatisk smitte’ (ersiutaasut takkutinnginnerini tunillaaneq).

Ersiutaasunik peqarnani tunillaaneq

Inuit ilaat aamma virusimik anitaqarsinnaapput taamalu allat tunillallugit, naak namminneq ersiutaasunik peqanngikkaluarlutik, taanna taaneqartarpoq ’asymptomatisk smitte’ (ersiutaasunik peqarnani tunillaaneq).

Ersiutaasunik peqarluni tunillaaneq

Inuit akornanni tunillaanissamut uloriarnartorsiorneq annerpaavoq, tunillatsissimasoq ersiutaasunik erseqqissunik peqarpat, taava imaappoq ersiutaasunik peqarluni tunillaaneq.

Inuiaqatigiinni tunillaassornermut nalinginnaasumut naleqqiullugu inummit annikitsuinnarmik ersiuteqartumit imaluunniit ersiutaasunik peqanngitsumit, tassa imaappoq ersiutaasut takkutinnginnerini tunillaaneq aamma ersiutaasunik peqarnani tunillaaneq, tunillatsinneq annertusinnaalluarpoq.

Tuniluunnerujussuaq

Danmarkimi massakkut pisut tunillaanissamut annertuumik pinaveersaartitsiviusumi taamalu tunillaassornermik nakkutilliiviusumi, pisut nalaatsortut ataasiakkaat tassanngaannaq tuniluunnermik pilersitsisinnaapput, sumiiffinni aalajangersimasuni imaluunniit nunami tamarmi. Tassunga atatillugu pisoq “tuniluunnerujussuaq” immikkut ukkatarineqarpoq, tassani inuk tunillatsissimasoq inuppassuarnik ataatsikkut tunillaasoq pineqarpoq.

Tuniluunnerujussuaq assigiinngitsunik tunngaveqarsinnaavoq, tassunga ilaallutik inuit qanoq amerlatigineri, qanoq imminnut ungasitsigineri/qanitsigineri, qanoq sivisutiginera, qanoq pissusilersorneq, ulorianartorsiortitsisinnaasut soorlu erinarsorneq, tunillatsissimasup virusimik nappaataa il.il.

’Tuniluunnerujussuaq’ nassuiaataasinnaavoq tunillatsissimasut ikittuinnaat inuiaqatigiinni tunillaassuunnermik annertuumik siaruarterisuunerannut. Tuniluunnerujussuarlu pinaveersaartinneqarsinnaappat tuniluunneq annertuumik nakkutigineqarsinnaalissaaq.

Aamma atuarsinnaavatit
Nutarterneqarpoq: 24. marts 2021