airplanebooksbriefcase business cogs cross election entertainment fish house law lockmedicalpeopleselfservices socialtax

Aarlerinartorsiortut immikkullu mianerisariallit

Peqqinnissaqarfiit matuma ataani ilitsersuummik siunnersuutinik pitsaasunik immikkullu malittarisassanik imalimmik suliaqarput.
Inuit COVID-19-imik napparsimalerlutik perulunneruleratarsinnaasut

COVID-19-imik napparsimallutit perulunneruleratarsinnaanersutit nalilersortinneq ataasiakkaartumik nalilersuinerujuaannassaaq, nalilersuinermilu ilinnut tunngasut tamarmik ilanngunneqassapput.

Taamaakkaluartoq ataatsimut isigalugit inuit ukioqqortunerusut katsorsarneqarsinnaanngitsunillu arlalinnik annertuunillu nappaatillit inunnit katsorsarneqarsinnaanngitsumik annertunngitsumik ataasiinnarmik nappaatilinnit navianartorsiorsinnaanerupput. Inuttut atukkat, assersuutigalugu inissaqarnermut tunngasut, pissutigalugit ataatsimut isigalugu navianartorsiortitsinerulersinnaapput.

Inuit 80-inik ukiullit utoqqaanerusulluunniit

80-inik ukioqaruit utoqqaaneruguilluunniit peqqissuugaluarlutit qiimasuullutillu, katsorsarneqarsinnaanngitsunik nappaateqaruit atugaqaruilluunniit perululersinnaanerusut akornanniipputit.

Inuit 65-it 79-illu akornanni ukiullit

Inuit peqqissut qiimasullu 65-it 79-illu akornanni ukiullit perululersinnaanerusut akornanniinngillat, kisianni perululersinnaanerusut akornanniissinnaavutit:

  • katsorsarneqarsinnaanngitsunik nappaateqaruit, imaluunniit
  • tarnikkut timikkulluunniit sanngiiffeqaruit assigisaannilluunniit atugaqaruit

Inuit 65-it inorlugit ukiullit

Inuit 65-it inorlugit ukiullit perululersinnaanerusut akornanniittut ikittuararsuupput, kisianni inuit taamatut ukiullit perululersinnaanerusutut akornanniissorineqarput:

  • katsorsarneqarsinnaanngitsunik assigiinngitsunik nappaateqarunik
  • katsorsarneqarsinnaanngitsunik aqukkuminaatsunik nappaateqarunik
  • BMI 35-nik annerusumilluunniit oqimaappallaarunik, aamma/imaluunniit timimi akiuussutissakinnerugunik

Meeqqat inuusuttullu aalajangersimasut katsorsarneqarsinnaanngitsumik nappaatillit

Nappaatit atukkallu inersimasuni perululersinnaanerusut akornanniitsitsisut meeqqanut inuusuttunullu toqqaannartumik tuniluussinnaanngillat.

Meeqqat inuusuttullu perululersinnaanerusut akornanniissinnaasut tassaagajunnerupput meeqqat COVID-19-imik nappaalasoqalinnginnera sioqqullugu immikkut ittunik atugaqarnissamut maleruagassaqartut, ass. atuarfimmi/meeqqerivimmi immikkut atugaqartinneqartut. Meeqqat taakku nakorsiartarfinni immikkut ittumit malinnaaffigineqarajupput, taassuunalu tamarmik immikkut nalilersorneqarlutillu siunnersorneqartarlutik.

Paaqqutarinnittarfinni/utoqqaat illuini najugallit

Paaqqutarinnittarfinni/utoqqaat illuini najugallit perululersinnaanerusut akornanniipput, taakkumi amerlanerit utoqqaapput katsorsarneqarsinnaanngitsunillu nappaateqarlutik, pisinnaasakinnerullutik peqqiinnerullutillu.

Naartusut

Naartusut naartunerat naartuilu eqqarsaatigalugit perululersinnaanerusut akornanniittutut isigineqarput.

Inunnut perululersinnaanerusut akornanniittunut siunnersuutitsialaat

Inuttut perululersinnaanerusut akornanniittutut ataatsimut isigalugu COVID-19-imik nappaalasoqalinnginnera sioqqullugu ileqqut attatiinnarneqarsinnaapput, ass. suliartorneq, sunngiffimmi sammisassanut peqataaneq erngutserinerlu.

COVID-19-imik nappaalasoqalinnginnera sioqqullugu ulluinnarni nappaatinik tunillatsinnaveersaartarsimaguit, assersuutigalugu timimi akiuussutissakinnerunikkut immikkut atugaqarnermi, taakku ileqqut maliinnartariaqarpatit.

Nunatta Nakorsaarneqarfiata inunnut perululersinnaanerusut akornanniittunut makku siunnersuutigai:

  • Nunatta Nakorsaarneqarfiata tamanut siunnersuutai maleqqissaakkit allallu illit pillutit malinneqqullugit.
    Akiuussutissamik kapineqarsimagaluaruilluunniit siunnersuutit tamanut atuuttut maliinnarnissaat siunnersuutigaarput
  • Suliffinni immikkut iliuuseqartariaqarnersoq eqqarsaatigiuk


Utoqqaaneruguit – nappaatitit katsorsarneqarsinnaanngitsut amerlanerussapput – siunnersuutit maluginiarnerusariaqarpatit. Kisianni inuuninni killilersuilertinnak soorunami inuunivit pitsaassusia eqqarsaatigissavat.

Pissutsit tamarmiusut qanoq iliuuseqarfigissanerlugit nalorniguit najukkanni peqqinnissaqarfimmut nakorsamulluunniit ilinnut katsorsaasussamut attaveqarit.

Inuit perululersinnaanerusut akornanniittut qanigisaannut siunnersuutitsialaat

Inuit perululersinnaanerusut akornanniittut qanigisaasutut ernumaneq pissusissamisuuginnarpoq.

Inuit perululersinnaanerusut akornanniittut qanigisaannut makku siunnersuutigaavut:

  • Nunatta Nakorsaaneqarfiata tunillaassuinnginnissamut tamanut siunnersuutai maleqqissaarniarsarikkit. Siunnersuutit eqqaamanissaannut qanigisatit najugaqatitillu ikiukkit – aamma meeqqat.
  • Ersiutit COVID-19-ip ersiutigisimasinnaasai maluginiaqqissaakkit. Nappaatip ersiutaanik peqaruit piaartumik imminut mattusimalersigit. Ersiutit annikikkaluarpataluunniit coronavirusimilluunniit nutaamik tunillatsissimasumut qanillisimaguit aamma taamaaliussaatit. Coronavirusimik nutaamik tunillatsissimaguit inummillu perululersinnaanerusut akornanniittumik najugaqateqarlutit angerlarsimaffiup avataani najugaqarallarnissamut akiliunneqarsinnaavutit.


Paasisaqarnerorusukkuit Corona pillugu allattoqarfimmut attaveqarit

Nutarterneqarpoq: 18. marts 2021