airplanebooksbriefcase business cogs cross election entertainment fish house law lockmedicalpeopleselfservices socialtax

Coronavirus (COVID-19)

Coronavirusi nutaaq/COVID-19 suua?

Coronavirusi virusit ilagaat annikitsumik nuffasertitsisinnaasoq aammali anersaartuutinut sakkortuumik aseruutsitsisinnaasoq.

2019-imi decembarimit coronavirusit ilaat nutaaq, siornatigut inunnit nappaatigineqarsimanngitsoq, Kinami tunillaassuutilerpoq. Nappaat coronavirusi nutaaq WHO-mit COVID-19-imik (Corona Virus Disease 2019) taaguuserneqarpoq.

Coronavirusi qanoq tuniluuttarpa?

Virusip tuniluunnera assigiinngitsunik marlunnik pisinnaavoq:

  • Kuserneeqqatigut tuniluunneq
    Inuk quersortoq tangajortorluunniit qanillimagaanni tunillatsinneq nalinginnaavoq. Quersortoqarnerani tangajortoqarneranilu kuseriarneeqqat virusitaqarsinnaapput, aamma sorlunut, isinut qanermulluunniit pippata tunillatsissinnaavutit. Taamaattumik immitsinnut qanippallaartassanngilagut.
    Quersornermit tangajornermilluunniit kuseriarneeqqat silaannakkut 1-2 meterimut ungasitsigisumut siammartarput, sukkasuumilli nunamut tuttarlutik. Virusip silaannarmiitsilluni tuniluussinnaanera ilimagineqanngilaq. Taamaattumik tuniluunneq "silaannakkut" pineq ajorpoq.

  • Inummiit inummut attaveqarnermi tunillaassuunneq
    Suulluunniit qaavi inuummit viruseqartumit attorneqarsimasut attorneranni aamma tunillatsittoqarsinnaavoq. Virusi amikkut tuniluunneq ajorpoq. Kisianni suulluunniit qaava virusitalik attoraanni tamatumalu kingorna kiinaq attoraanni virusi sorluit, qarnup isilluunniit ameraasaannut pisinnaasarpoq, taamaasillutillu tunillatsissinnaavutit.
    Taamaattumik akulikitsumik assaat errortorluarneqartassapput assannillu kiinaq attornaveersaarneqassalluni.

Napparsimaneq maluginngikkaluarlugu tunillaasoqarsinnaava?

Aap, kisianni inuit tunillaassuinerpaat tassaapput napparsimasut quersortorujussuit tangajoqattaartorujussuillu. Virusi qanoq annertutigisoq kaanngartinneqartarnersoq aamma ersiutit qanoq sakkortutiginersut kiisalu qanoq napparsimatigineq apeqqutaatillugit tunillaassuuttoqartarpoq. Anersaartuutit aqqutaanni tangajornerni quersornernilu viruseqarujussuaraanni allat tunillanneqarnissaat ilimanaatilerujussuussaaq. Taamaammat COVID-19-imik ersiuteqaruit tunillatsissimaguilluunniit angerlarsimaffinni mattusimassaatit.

MALUGEQQUNEQARPOQ: Inuit ersiuteqanngikkaluarlutik nappaateqarnertillu namminneq sianiginngikkaluarlugu tunillanneqarsimasullu ilaasa napparsimalernissaat sioqqullugu nappaateqalersimanerat allanit paasineqarsimanngikkaluartoq tunillaassuisinnaasut nalunngilarput. Taamaattorli tunillatsissimasutut ersiuteqanngitsumit tunillatsissagaluaruit qanilleqqasimagukku aatsaat tunillatsissinnaavutit.

Tassa inuit napparsimasutut misigisimanngikkaluarlutik allanik tunillaasarnerat pissutaaqataalluni COVID-19 nunarsuarmi tamarmi taama sukkatigisumik tuniluussinnaasimavoq. Inuk tunillatsissimasoq peqqippasissorli aamma inuppassuarnik attaveqartartoq inuppassuarnik tunillaapallassinnaavoq. Taamaattumik inunnik allanik timikkut attaveqartarnissat killilersorneqarnissaat oqartussaasut siunnersuutigaat, aamma peqqikkaluartulluunniit. Immitsinnut qanippallaartassanngilagut - aamma assamminnaveersaassaagut eqitaarinaveersaarlutalu.

Virusi pisattat qaavisigut tuniluussinnaava?

Aap. Eqqaamassallugu pingaaruteqarpoq pisattat virusillit attuuanerinnaasigut tunillatsittoqarneq ajortoq. Virusi tuniluutissaguni qarngup, sorluit isillu ameraasaannik attueqqaartariaqarpoq. Taamaattumik pigisanik attuinissaq ersissutigisariaqanngilaq. Taamaattorli errortortarnissarput eqqaamassavarput.

Siunnersuutigaarput akulikitsumik errortorluartassasutit, aamma angerlaraangavit. Akulikitsumik peqqissaartumillu errortukulanissat, aammalu angerlarnerit tamaasa errortorluartarnissat innersuussutigaarput. Tamatuma saniatigut silamiinninni assavit eqqiluippallaannginneranni kiinnat attortassanngilat.

Coronap allanngornera suua?

Allannguutit
Virusit allanngortarnerat nalinginnaasuuvoq, virusillu siaruaanneri ilutigalugit allanngortoqartarpoq.

Allannguutit amerlanerit virusit sunniutaannik allannguineq ajorput taamaammallu pingaaruteqarneq ajorlutik. Allannguutit allat virusit sunniutaannik sakkukillisitsisarput. Suussutsit taakkua ilaat allannguutitaqartarput virusip uumassuseqassusiinut allannguisartunik, assersuutigalugu virusi tuniluutinerulerluniluunniit siusinnerusukkut akiuussutissanit coronamilluunniit tunillatsinnernit antistoffinik pilersitsinaveersaartitsisarluni.

Coronap allannguutai annilaanngatigissavakka?
Allannguutit ilaat ilisimatuunit immikkut malinnaavigineqarput.

Allannguutit immikkut ittut ataani allassimasut oqartussaasunit immikkut nakkutigineqarput:

  • tuniluutianerusut
  • ilungersunarnerusumik napparsimalersitsisartut
  • uumasunit inunnut paarlattuanillu siaruaattartut
  • akiuussutissamik sunniutikinnerulersitsisartut


Taavami allannguutit Kalaallit Nunaallu?
Allannguutit siaruaannissaat pinaveersaarniarlugu Kalaallit Nunaat avataanit tikittoqaqqusiunnaarpoq januaarimi 2021.

Ulloq manna tikillugu coronap allannguutai Kalaallit Nunaanni nappaatigineqarsimanngillat.

Coronavirusi pillugu annerusumik atuagaqarusuppit?
Nutarterneqarpoq: 16. marts 2021