airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-ip ersiutai sivisuumik atuuttut/kingunerluutit

Inuit COVID-19-imik tunillatsissimasut amerlanerpaat katsorsarneqaratik peqqissisinnaasarput, piffissallu sivisusinnaagaluartup qaangiunneratigut ulluinnaat atoqqilersarlugit. Ilaasali ersiutit piffissami sivisunerusumi misigisarpaat.

COVID-19-ip ersiutai sivisuumik atuuttut/kingunerluutit pillugit
1. COVID-19-ip ersiutai sivisuumik atuuttut/kingunerluutit suuppat?

Qanoq ilisukkut kingunerluuteqartoqartarneranut pisortatigoortumik nassuiaasoqarsimanngilaq. Taamaattumik qanoq ilisukkut COVID-19-imut kingunerluutaaneqarnerartunik kingunerluuteqartoqarnera sivisuumillu atuuttunik ersiuteqartoqarnera pillugu oqartoqarsinnaanersoq immikkoortikkuminaassinnaavoq.

Sivisuumik atuuttunik ersiuteqarluni napparsimaneq kingunerluuteqarluniluunniit napparsimaneq eqqartorneqaraluarpalluunniit peqqinnissaqarfimmit iliuuseqartoqarnissaanik tamatigut pisariaqartitsisoqarneq ajorpoq. Ersiutit sakkukinnerusut aamma qaammatini arlalinni atuuttut piffissallu ingerlanerani sakkukilliartorsinnarlutik naggataagut peeruttut eqqartorneqarsinnaapput. Paarlattuanilli sapaatit-akunneri 12-it iluanni peqqinnissaqarfimmit iliuuseqartoqarnissaannut pisariaqartitsisoqarsinnaavoq. Tamanna tamatigut ersiutit qanoq pisariutiginerannik sakkortutiginerannillu nalinersuinermik pissuteqartarpoq.

2. COVID-19-ip ersiutai sivisuumik atuuttut/kingunerluutit sorliit atorneqarajunneruppat?

COVID-19 ersiutinik sivisuumik atuuttartunik assigiinngitsunik arlariinnik, inummiit inummut assigiinngitsunik sakkortussusilimmik atorneqartartunik inuullu piginnaasaanut assigiinngitsumik sunniuteqartartunik, kinguneqarsinnaasarpoq.

Ersiutit sivisuumik atuuttartut (ersiutit saqqummeqqaarnerannit sap. ak. sisamat sinnerlugit atuuttartut) assigiinngitsut nalunaarutigineqarsimapput.

Atorneqarajunnerusullu tassaapput:

  • Anernikilliorneq quersornerlu
  • Sakisserinerit, sakissakkut naqisimaneqartutut misigineq uummammillu tilleruluttoorneq
  • Qasoqqaneq kissarneqarnerlu
  • Paasinnissinnaanikkut eqqarsarsinnaanikkullu ajornartorsiuteqarneq, soorlu aallussilluarsinnaannginneq, eqqaamannissinnaanermut ajornartorsiorneq, niaqorlunneq, sinnarliornerit, maluginiutikillineq maluginiutilluunniit allanngornerat, uissannguneq, silassorissutsikkut ajornartorsiorneq (annerusumik utoqqaanerusuni takussaasoq).
  • Nasserinerit, meriannguneq, timminneq, neriumajunnaarneq/nererusussusikillineq (utoqqarni)
  • Naggussakkut nukikkullu anniarnerit
  • Isummakkut nanertisimanermut annilaanganermullu ersiutit
  • Mamassusersiuutaarunneq naamasaarunnerlu, siutini siorsuttoorneq, siuserineq, toqqusaarlunneq, uissannguneq
  • Ammimi anillattoorneq


Maluginiarneqassaaq ersiutit nalunaarutigineqarsimasut amerlanerpaat pillugit ilisimasat annikimmata.

3. Kikkut COVID-19-ip ersiutaanik sivisuumik atuuttunik/kingunerluutinik atuisarpat?

Naatsorsuutigineqarpoq inuit COVID-19-imik napparsimasimasut 10 %-iisa missaanniittut ersiutinik sivisuumik atuuttunik (ersiutit saqqummeqqaarnerannit sap. ak. sisamat sinnerlugit atuuttartunik) atuisartut. Taakkunannga qanoq amerlatigisut sap. ak. 12-it qaangiukkaangata ersiutinik misigisaqartarnersut, taamaalillutillu kingunerlutsitsivittartut, ilisimaneqanngilaq.

Ukioqatigiiaani tamani COVID-19-imut atatillugu sivisuumik atuuttartunik ersiuteqarneq/kingunerlutsitsineq takussaavoq. Aamma inunni sakkukinnerusumik sakkortunerusumillu napparsimmavimmi peruluttulluunniit inaanni uninngasariaqarsimasuni tamakku takussaapput.

4. COVID-19-ip ersiutai sivisuumik atuuttut/kingunerluutit qanoq ilisimasaqarfigitigaagut?

COVID-19 nappaataammat nutaajusoq ersiutinut sivisuumik atuuttartunut kingunerluutinullu ilisimasat suli killeqarput. Inuit COVID-19-imut atatillugu kinguneqartitsisarnerannut pissutaasut assigiinngitsuusinnaapput. Pissutaasut ilaat, soorlu anersaartuummik atuisimanermi, ilisimaneqarput, pissutaasulli allat suli ilisimaneqalernatik.

Ersiutilli sivisuumik atuuttartut kingunerluutilluunniit nutaarsiassaanngillat coronavirusinut pioreersunut, soorlu SARS-imut MERS-imullu, atatillugu allaatigineqartareermata.

5. COVID-19-ip ersiutaannut sivisuumik atuuttunut/kingunerluutinut katsorsartissinnaavunga?

Ersiutit sivisuumik atuuttartut kingunerluutilluunniit inunni assigiinngitsunik sivisussuseqartarmata katsorsarneqarnissamut iliuuseqarfigineqarnissamullu pisariaqartitsinerit assigiinngillat. Amerlanerit nammineq iliuuseqarnikkut qaangerneqarsinnaasarput, naak inuit ilaanni qaangiunniarnerat sivisunerusinnaasaraluartoq.

Sivisuumik atuuttunik ersiuteqarluni napparsimaneq kingunerluuteqarluniluunniit napparsimaneq eqqartorneqaraluarpalluunniit peqqinnissaqarfimmit iliuuseqartoqarnissaanik tamatigut pisariaqartitsisoqarneq ajorpoq. Ersiutit sakkukinnerusut aamma qaammatini arlalinni atuuttut piffissallu ingerlanerani sakkukilliartorsinnarlutik naggataagut peeruttut eqqartorneqarsinnaapput. Paarlattuanilli sapaatit-akunneri 12-it iluanni peqqinnissaqarfimmit iliuuseqartoqarnissaannut pisariaqartitsisoqarsinnaavoq. Peqqinnissaqarfiup iliuuseqarnissaa tamatigut ersiutit qanoq pisariutiginerannik sakkortutiginerannillu aamma piginnaasatigut qanoq inummut sunniuteqartiginerannik nalilersuinermik pissuteqartarpoq.

6. COVID-19-ip kingunerluutai ataavartumik nappaataalersinnaappat?

Suli siusippallaarpoq kingunerluutit qanoq sivisutigisarnerat oqaatigissallugu, kisianni nalilerneqarpoq amerlanertigut sakkukilliartortartut, naak inuit ilaanni piffissami sivisunerusumi atuuttaraluartut. Taamaattumik tamakku qaanginngitsuuinneqartarnerannut takussutissaqanngilaq. Taamaalillutik ersiutit sivisuumik atuuttartut kingunerluutillu sap. ak. 12-init sivisunerusumik atorneqartut ataavartumik nappaataalersanngillat.

7. Isumaqaruma COVID-19-ip ersiutaanik sivisuumik atuillunga/kingunerluuteqartitsillunga sumut saaffiginnissinnaavunga?

COVID-19-imik napparsimasimaninnut atatillugu piffissami sivisunerusumi ersiutinik misigisaqarsimaguit ernumaguillu aallaqqaasiutaasumik nassuiaateqarfigineqarniarlutit najukkanni peqqinnissaqarfik attavigissavat.

Najukkami peqqinnissaqarfiup sakkukinnerusunik kingunerluuteqartitsisut – siornatigut uninngasimasut uninngasimanngitsullu – katsorsaasersinnaavai.

Naatsorsuutiginngisamik aamma/imaluunniit pisariusumik sivisuumillu kingunerluuteqarnermi Dronning Ingridip Napparsimmavissuanut nassuiaammik allamik pissarsiumasoqarsinnaavoq.

Nutarterneqarpoq: 23. marts 2021