airplanebooksbriefcase business cogs cross election entertainment fish house law lockmedicalpeopleselfservices socialtax

Tarnikkut peqqissutsip eqqumaffigineqarnerunissaanut innersuussutit

Nunarsuaq tamakkerlugu coronamik tunillaassuuttoqarnerani piffissaq atugarput artornarsinnaavoq. Nappaatinik tunillaassortunik napparsimalerneq, soorlu coronavirusi maanna atuuttoq, atugarissaarninnut tarnikkullu peqqissutsinnut sunniisinnaavoq.

Tunillatsissinnaaneq aningaasaqarnerlu pillugit ernumanerit kiserliulersitsisinnaapput, aammalu uisakajaarnermut, nanertisimanermut qasorujussuarnermullu ersiutinik pilersitsisinnaallutik.

Piffissap coronavirusimik tuniluuffiusup qaangerluarnissaannut illit qanigisavillu qanoq iliorsinnaanissinnut siunnersuutitsialaat pillugit matumani atuarsinnaavutit.
Imminut paarigit

Imminut paarigit
Pissusilersortarnerit peqqinnanngitsut, soorlu nikerartumik sinittarneq, aalakoornartutorpallaarneq imaluunniit pujortarneq misilillugu pinaveersaakkit.

Sininniartarit nalinginnaasumillu ulluinnarni iliuuserisartakkatit ingerlallugit
Sinnakilligaluttuinnartillutit ernumanerit sakkortusiartortarpoq annilaangaleraluttuinnartarlutillu.

Peqqinnartunik assigiinngitsunillu nerisaqarit
Taamaalillutit nukissaqarnerulissaatit ulluinnarnilu unammilligassanut nukissaqarnerulissallutit.

Ulluinnarni ataqatigiinneq pilersiguk

Ulluinnarni siumoortumik naatsorsuutiginnissinnaanissaq ataqatigiissitsisinnaanissarlu isumassarsiatsialaapput.

Taamaammat ullormi imaluunniit sapaatip-akunnerata ingerlanerani suliassat pillugit pilersaarusiorit imaluunniit malitassaliorit. Periutsinik aalajangersimasunik ullup ingerlaneranik takussusiisuusunik atuilerniarsarigit.

Angerlarsimaffimmi sulisarsimaguit nalinginnaasumik piffissami suliffigisartakkanni suliniartarit piffissamilu nalinginnaasumik soraarfigisartakkanni soraarniartarlutit.

Eqqissisimaartarit

Piffissap ilaani eqqissisimaartarit ernumassutitillu puigulaarlugit.

Nutaarsiassanik isiginnaarnermi atuarnermiluunniit piffissap atukkap sivikillisinnissaa isumassarsiatsialaavoq.

Paasissutissinneqartarneq pitsaasuuvoq, nutaarsiassanilli pissarsiffiusinnaasut uppernartut toqqartakkit.

Arlaannik allarluinnarmik eqqarsalersitsisumik aamma ilorrisimaarnermik eqqissisimaarnermillu misigiffiusumik sammisaqartarnissat aamma pingaaruteqarpoq. Tamatuma uippakajaalernissaq pinaveersaartittarpaa.

Pisuutitsissanngilatit

COVID-19-inimik tunillatsikkuit imminut pisuutissanngilatit inunnilluunniit allanik pisuutitsissanngilatit.

Eqqaamajuk nappaat inunnik pissuteqarani virusimik pissuteqarmat.

Coronavirusi ajornanngitsuararsuarmik tuniluuttarpoq, tunillatsinnerlu inunnik pigisanillu attuinikkut pisarpoq.

Napparsimallutit innangasimaguit - coronavirusimik tunillatsissimanerit imaluunniit nappaammik allamik tunillatsissimanerit uppernarsineqarsimagaluartoq - imminut pisuutissanngilatit.

Ilisarisimasaqaruit tunillatsisimasumik imaluunniit napparsimalluni innangasumik taava tapersersornerisigut eqqissisarnerisigullu ikiukkit.

Timit aalatittaruk

Timivit aalatinnera illit peqqissutsinnut iluaqutaassaguni qiimanerulersitsissagunilu ilungersunartuusariaqanngilaq. Ulluinnarni sammisassat soorlu sisorarnerit pisuttuarnerillu aamma taakkununnga ilaapput.

Angerlarsimaffinni natermi eqaarsaarnissamut siunnersuuterpassuit internetikkut nassaassaapput, imaluunniit appit pitsaasut amerlaqisut eqaarsaariaatsinik takutitsisartut aasinnaavatit. Nipilersukkanik nuannarisannik appisimaarit qiterusaarlutillu - tamanna nuannivissumik illarnermik aamma kinguneqarsinnaasarpoq.

Inuit allat qanillivallaarnagit pisinnaappat ullormut aninissat timinnillu aalatitsillutillu silaannarissartarnissat pingaartittaruk. Ullup qaamanera qiimanerulersitsisarpoq. Taamaammat sisorarit, arpagit pisuttuarlutilluunniit.

Tarnikkut eqeersimaarit

Qarasarsornerit assigiinngitsunik sammisaqartarnikkut ataavartuutiguk.

Atuakkamik atuagassiamilluunniit atuarit, sudoku suliariuk, assinik ikkussortakkanik suliaqarit, nipilersukkanik tusarnaarit, imaluunniit pinnguaammik pinnguarit. Naatsumik oqaatigalugu, arlaannik aallussilersitsisinnaasumik ujartuigit.

Ullorsiutinnut allattarit, imaluunniit unnuit tamaasa qujamasuutigisat ataaseq pillugu allattarit, qanorluunniit annikitsigigaluarpat annertutigigaluarpalluunniit.

Titartaaneq, allanneq, qalipaaneq, erinarsorneq, nipilersorneq nuannarigukkit imaluunniit pinngorartitsisaruit, taava ilisimatusarnerit takutippaat tamakku tarnip peqqissusianik siuarsaaqataasinnaasartut.

Covid-19 pillugu tusatsiakkanik siaruarterinnginnissat eqqaamajuk

Inuit tunillatsittut akisussaassuseqanngitsuunerarneqarlutillu inoqatiminnut nalinginnaanngitsumik pissusilersorsimanerarneqarsinnaasarput, amerlasoorpassuillu tunillatsissimagaangamik imminnut pisuutilersarput.

Kisianni nappaatip inunnik pissuteqarani virusimik pissuteqarnera eqqaamassallugu pingaartuuvoq. Coronavirusi ajornanngitsuararsuarmik tuniluuttarpoq, tunillatsinnerlu inunnik pigisanillu attuinikkut pisarpoq.

COVID-19-imut atatillugu inunnik immikkoorutilittut naqissusiisarnerup unitsinnissaanut nappaat taassumalu qanoq tuniluuttarnera pillugu ilisimasaqarnikkut - aamma attaveqarfigisartakkanut ilisimasanik tamakkuninnga ingerlatitseqqittarnikkut - kikkut tamarmik ikiuussinnaapput.

Oqaatsinik inunnik assigiinngisitsisunik imaluunniit eqqunngitsumik paasissutissiisunik tusagaqaruit atuagaqaruilluunniit taama oqaluttut uneqqukkit.
Taamaaliornerup tusaamasarsorneq eqqunngitsumillu paasissutissiisarneq akiortarpaa.

Nutarterneqarpoq: 16. marts 2021