airplanebooksbriefcase business cogs cross election entertainment fish house law lockmedicalpeopleselfservices socialtax

Silaannarissarneq

Illup iluaniitillutit illup iluata silaannarissarneratigut coronavirusimik nutaamik tuniluunnissamut ulorianartorsiorneq annikillisinneqarsinnaavoq.
Silaannakkut tuniluunneq

Coronavirus nutaaq attaveqarnikkut kuseriarneeqqatigullu virusilitsigut inummiit inummut tuniluuttarpoq – tangajornikkut, quersornikkut, oqaloqatigiinnikkut imaluunniit assigisaasigut. Inuk assersuutigalugu quersorpat kuseriarneeqqat amerlanersaat nunamut tussapput, minnersaalli kuseriarnimineeqqanik taaneqarsinnaasut, sivisulaartumik silaannarmiiginnartarput tunillaanissamillu ulorianartorsiortitsisarlutik.

Illup ilua silaannarissarluarneqanngippat tuniluunneq silaannakkut ingerlasinnaavoq kuseriarneeqqat amerlanerulerlutik imminnut qaninnerulissammata. Silaannaap taarserneratigut kuseriarnimineeqqat ikilisinneqassapput taamaattumillu silaannarissaanissaq suersitsinerlu tuniluunnissamik pinaveersaartitsinertut innersuussutaavoq pingaarutilik.

Silaannaap taarsernera silaannarissaatikkut imaluunniit igalaat matullu ammanerisigut pisinnaavoq.

Angerlarsimaffinni imatut kinguneqarluartumik silaannarissaasinnaavutit

Inuit angerlarsimaffii nammineq pigisaat amerlasuut silaannarissaateqanngillat, taamaattumillu silaannarissarneq assammik ingerlanneqartariaqartarpoq nammineq ammaanikkut. Imaaliorsinnaavutit:

  • Igalaat matullu ammarlugit illu napimut suersilerlugu.
  • Ullormut 4-5-riarluni minutsini 5-10-ni suersitsineq.
  • Illup iluani inuit arlaliugussi taava akulikinnerusumik silaannarissaagitsi, assersuutigalugu pulaartoqannginnermi kingornatigullu.
  • Inimi ataatsimi inuit arlallit sivisulaartumik isersimappata nalunaaquttap akunnera ataaseq qaangiukkaangat suersitsisaritsi.


Silaannarissarneq pingaartuuvoq, kisianni nalinginnaasumik tunillatsinnissamut pinaveersaartitsinermut innersuussutit taarsinngilai.

Suliffinni aamma illup iluini tamanit tikinneqarsinnaasuni silaannarmik taarsiineq

Silaannarissaatit silaannaap taarsernera aqussinnaavaat kuseriarnimineeqqallu virusillit peersinnaallugit, inimi katersuutinnginniassammata. Taamaattumik inini tamanit iserfigineqarsinnaasuni silaannarissarneq eqqunneqartariaqarpoq pitsaanerulersinneqarluniluunniit – assersuutigalugu paaqqinniffiit, atuarfiit, allaffiit, pisiniarfiit aamma neriniartarfiit angallassissutillu tamanit atorneqarsinnaasut soorlu qimuttuitsut, metro aamma bussit. Silaannarissaatinut atuuppoq silaannarmik atueqqissanngimmata aamma avataaniit sillaannarmik milluaalluni atuineq annertunerulissammat.

Suliffimmi imaluunniit inini tamanit iserneqarsinnaasuni silaannarissaateqanngippat silaannaq taarserneqassaaq suersitsinikkut, igalaat matullu napimut minutsini 5-10-ni ullormut 4-5-riarlugit ammatinnerisigut aammalu inimi inuit arlallit isersimappata nalunaaquttap akunneri tamaasa. Tassani innersuussutigineqarpoq inip silaannarissarneranik inuit anigallartassasut.

Aamma atuarsinnaavatit
Nutarterneqarpoq: 24. marts 2021