airplanebooksbriefcase business cogs cross election entertainment fish house law lockmedicalpeopleselfservices socialtax

Qaqugukkut qanermut assiaqut imaluunniit kiinnamutassiaqut atortassavara?

Qanermut assiaqutit qanillinnginnissamut ajornakusoorfiusuni tunillaassuinermik pinaveersaartitseqataasinnaapput. Naak qanermut assiaquteqaraluarlutit inunnut qanillinnginnissamut eqqiluisaarluarnissamullu siunnersuutit suli malissagitit pingaaruteqarpoq.
Qaqugukkut qanermut assiaqut kiinnamulluunniit assiaqut atorneqassava?

Pisuni ukunani Kalaallit Nunaanni qanermut assiaquteqarnissaq piumasaqaataavoq:

  • Nunanut allanut nunatsinnulluunniit timmisartornermi (qanermut assiaqut angerlarsimaannarfigisassap/apuuffissap tungaanut atorneqassaaq*)
    Tamanut, matumanili ikittuinnaat minillugit, aqqaneq-marlunnit amerlanerusunik ukiulinnut kiisalu timmisartumi saqisunut, timmisartumiinnermi, timmisartoqarfimmiinnermi imaluunniit ikiartortarfimmiinnermi/aallariartortarfimmiinnermi tamanna atuuppoq.
    Angalasunik ikiartortarfinni/aallariartortarfinni assigisaanniluunniit qanimut attaveqarlutik sullissisut qanermut kiinnamulluunniit assiaquteqassapput sullissisut angalasullu akornanni plastikkimik assiaquteqarsinnaanngippat. Matumani Kalaallit Nunaannut Kalaallit Nunaannilu angalanermut piumasaqaatit pillugit Namminersorlutik Oqartussat nalunaarutaat nr. 10, 15. februar 2021-meersoq innersuussutigineqarpoq.
  • COVID-19-imik tunillatsissimaguit tunillatsissimasinnaaguilluunniit aammalu pisariaqavitsillugu soorlu assersuutigalugu misissortikkiartorniarlutit anissaguit.


*Tassa imaappoq, Mittarfeqarfimmut isereerninniit apuuffissannut tikinnissavit tungaanut qanermut assiaqut atussavat. Tamanna aamma atuutissaaq angallanneqarnerup nalaani angallammut ilaasartaammut ilaaguit, imaluunniit bussit taxalluunniit aqqutigalugit ingerlaaqqissaguit. Assersuutigalugu Kastrupiminngaanniit Qaqortumut angalassaguit najukkamut angerlarsimaannarfigisassamut apuunnissavit tungaanut aqqut tamaat qanermut assiaqut atussavat.

Qanermut assiaqutit assigiinngitsut qanoq ittuuppat?

Qanermut assiaqutit CE-mik nalunaaqutsikkat
Inimi tamanit isersimaffigineqarsinnaasumi qanermut assiaqummik atuinissap pisariaqarfiani qanermut assiaqutinik CE-mik nalunaaqutserneqarsimasunik atuinissaq innersuussutigineqarpoq.
Tunisassiortup pitsaassutsimik uppernarsaasimanera CE-mik nalunaaqutsigaanerata takutippaa.

Qanermut assiaqutit CE-mik nalunaarutsikkat type 1-it atornissaat naammappoq. Allanit tunillatsinnissannut aamma allat ilinnit tunillatsinnissaannut illersuutaapput.

Ilungersunartumik napparsimalernissamut annertunerusumik aarlerinartorsioruit imaluunniit COVID-19-imik tunillatsissimasutit paasineqarpat qanermut assiaqummik CE-mik nalunaaqutsersimasumik atuisariaqarputit.

Qanermut assiaqutit annoraaminermik sanaat
Qanermut assiaqutit annoraaminermik sanaat pisiaagaluarpata namminerluunniit sanaajugaluarpata CE-mik nalunaaqutsersimasutut pitsaassusiligaanngillat. Qanermut assiaqutinik malitassat suliffissuaqarfinnut tamanut atuuttut malillugit suli tunisassiortoqanngilaq, taamaattumik tunisassiat najuussassaanngitsunik tigooraasinnaassutsimikkut assigiinngiiaarsinnaapput.

Qanermut assiaqutinik annoraaminermik sanaanik atuissaguit qanermut assiaqutip pitsaanerpaamik iluaqutaatinnissaanut qulakkiigassannik ilisimasassaqarputit. Assersuutigalugu pingasunik qaleriinnilerneqassapput. Elastikkeqartinneqassapput kiinnamullu attuumasinnaassallutik, taamaalillutik qingaq qanerlu asseqqaneqassallutik. Annoraaminertaa ammalanani najuussassaanngitsunik tigooraasinnaassuseqassaaq, aammali anersaartuutigineqarsinnaassaaq. Taamatuttaaq 60 gradimi errorneqarsinnaassapput.

Kiinnamut assiaqutit
Kiinnamut assiaqutit amerlanertigut plastikkimik sanaajusarput, kiinnamut assiaqutaapput virusimullu assiaqutitut atorneqarsinnaallutik. Kiinnamut assiaqutit kiinnamut attuutivinnagit atugassiaapput illersuisinnaanermikkullu assigiinngitsunik pitsaassuseqarsinnaallutik.

Kiinnamut assiaqutit kiinnamut attuunnagit atugassiaaneri pissutigalugit illersuisinnaanerisa annikinnerunerat aammalu kiinnamut assiaqutit soorluttaaq qanermut assiaqutit malittarisassat suliffissuaqarfinni tamani atuuttut malillugit tunisassiaannginneri pissutigalugit assigiinngitsunik pitsaassuseqarneri eqqumaffigissallugit pingaaruteqarpoq.

Kiinnamut assiaqutit qanermut assiaqutinut sanilliullugit nalinginnaasumik ulloq naallugu atorneqarsinnaapput ilaallu allaat errorneqarsinnaasarlutik atoqqinneqarsinnaasarlutillu.

Kiinnamut assiaqut qanermut assiaqutitulli eqqortumik atorneqassaaq, tassa imaappoq atorneqartillugu attuuaneqassanngilaq. Tunillaasinnaaneq pinaveersaartinniarlugu assiaqutip piinnginnerani atineqannginneranilu assaat errortoqqaarneqassapput spritersimassallutilluunniit.

Qanermut assiaqummik atuinani kiinnamut assiaqummik qaqugukkut atuisarnissaq innersuussutigineqarpa?

Qanermut assiaqut naleqqutinngippat, tassa inuk qanermut assiaqummik atuisinnaanngippat imaluunniit pisumi immikkut ittumi kiinaq nuisasariaqarpat kiinnamut assiaqutip qanermut assiaqummut taarsiullugu atorneqarnissaa innersuussutigineqarpoq.

Atueqqittarneq igitsisarnerlu

Qanermut assiaqutit suliffissuaqarfinni tunisassiarineqartut ataasiartagaapput atorneqareernermikkut iginneqartartussat. Qanermut assiaqutit masatserneqaraangamik, ipeqaleraangamik attuuaneqaraangamillu pitarneqarsinnaanerulersaramik illersuutaarussinnaasaramillu taarserneqartassapput.

Qanermut assiaqutit ataasiartakkat atorneqaqqinnissaat siunertaralugu errorneqarnissaat innersuussutigineqanngilaq. Qanermut assiaqutit ataasiartakkat errorneqarnermikkut najuussassaanngitsunik tigooraasinnaassusiat anersaartorfiusinnaanerallu sunnerneqartarput taamaalillutillu illersuutertik annaasarlugu.

Qanermut assiaqut inimi tamanit isersimaffigineqarsinnaasumi atorsimasaq eqqagassatut nalinginnaasutut iginneqassaaq.

Qanermut assiaqummik igitsereernermi assaat asaffimmi assannulluunniit spritimik errortorneqassapput.

Isarussatit iluppata qanoq iliussavit?

Isaruaqaruit qanermut assiaquteqarninni isarussatit ilusarsinnaapput.

Isigisamut ippinnarsinnaavoq isarussavillu attoqattaarneratigut tunillatsinnissat aarlerinarnerulersinnaalluni.

Taamaattumik isarussavit qanoq ilunaveersaartissinnaanerannut siunnersuutitsialannik katersisimavugut:

  • Qanermut assiaqummik qingannut attuulluinnarluni inissisimasinnaasumik, assersuutigalugu qanermut assiaqummik saviminertalimmik, qingannut pussugunneqarsinnaasumik toqqaanissat eqqumaffigiuk.
  • Isarussavit igalaartai ullaat unnuillu tamaasa imermik kissalaartumik erruinermullu qaqorsaammik annikitsunnguamik salittakkit.
  • Tamatuma kingorna erruummik mikrofiberiusumik allartikkit. Qaqorsaatit isarussat issangernissaanik annikillisitsisarput.
  • Qanermut assiaqut sapinngisamik isivit killinnguanut inissiguk isarussatillu qingannut appaallatsillugit atukkit.

Meeqqat qanermut assiaquteqassappat?

Meeqqat qanermut assiaquteqassappata qanermut assiaqutip eqqortumik atornissaanut meeqqap paasinninnissaa pisariaqarpoq. Qanermut assiaqutip meeqqap kiinaani qasungavallaannginnissaa meeqqallu qanermut assiaqutip atisinnaanissaa peersinnaanissaalu pingaaruteqarput. Meeqqat taakkua tassaanerussapput meeqqat atuarfianni atualereersimasut.

Meeraaqqat inoorlaallu qanermut assiaquteqassanngillat.

Meeraaqqat – qanermut assiaquteqarsinnaanngitsut – assaasa eqqiluitsuunissaannik ikiorsinnaavatit COVID-19-imillu ersiuteqarnerannik nakkutigalugit.

Nutarterneqarpoq: 16. marts 2021