airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-imik tunillatsinnissara qanoq ilioruma pinngitsoortissinnaavara?

Oqartussat innersuussutaat malikkit

Tunillatsinnissap pinngitsoortinneqarnissaanut iliuusissaq pitsaanerpaaq tassaavoq oqartussat innersuussutaannik malinninnissaq:

COVID-19-imut ersiuteqaruit, tunillatsissimaguit imaluunniit coronavirusimik nutaamik tunillatsissimasumut qanillisimasuit angerlarsimallutit mattusimagit. Assatit errortortakkit, allanut qanillinaveersaarit, assammiinaveersaarit, kunissinallu eqinaarinaveersaarit, angerlarsimaffinni suliffinnilu eqqiaanissaq eqqumaffigiuk aamma katersuunnerit pinaveersaarsigit.

Pisuni tulliuttuni assaat errortornissaat immikkut pingaaruteqarpoq:

  • Perusuersareernermi
  • Nerisassiulernermi
  • Nerinissaq sioqqullugu (imaluunniit allat nerinissaannik ikiuinnginnermi)
  • Kakkereernermi
  • Meeqqavit (allalluunniit meeraasa) nangiinik taarseereernermi
  • Suliffimmit, niuerniarnermit assigisaannilluunniit angerlamut apuunnermi


Aamma errortorsimanngikkaanni kiinnakkut imminut attunnginnissaq eqqumaffigineqassaaq, isit, qingaq qanerluunniit aqqutigalugit imminut tunillattoqarsinnaammat.

Akulikitsunik errortortarit

Assaat errortorluartarnerat pequtitigut, assatsigut kiinnatigullu tuniluunnerit pinaveersaarnissaannut iliuusissaavoq pitsaanerpaaq.

Assaat errortortarnerat assannullu bakteriaajaammik tanittarnerat pitsaaqatigiipput. Taamaattoq innersuussutigineqarpoq assaat ersittumik ipeqalersimagaangata, assaat isugutakkaangata, perusuersartarfimmeereernermi, nanginik taarseereernermi nerisassiunnginnermilu tamatigut assaat errortortarnissaat.

Eqqaamassavattaaq assaat eqqiluisaartinnissaannut meeqqatit ikiussallugit.

Assaat eqqortumik errortorneqarnerat:

  • Assaat paffiillu isugutseqqaarneqassapput
  • Assannut qaqorsaat tagiulluarneqassaaq
  • Piffissaqarfigalugu errortorluarit - pussuit, kulluit, inussavit akorngisa assavillu tunuisa, itummavit paffivillu ilanngullugit asannissaat eqqaamajuk
  • Imermik assatit qaqorsaataajakkit assavillu panivinnissaata tungaannut, assersuutigalugu allarummik pappiaqqamik allarutissiaasumik allartikkit


Imeq qaqorsaallu amermut panertitsisarmata tarngummik panertoornaveeqqutitalimmik atuisarnissat eqqaamajuk.

Errortorluartarnissaq pillugu video isiginnaaruk (Kalaallisut oqaasertaqarpoq danskisut allagartalersugaalluni).

Meeqqat assaasa errortornissaat paarisarnissaallu

Meeqqat ilaasa assaat qajannartuupput, taamaattumik assaat errortukulanissaannut atatillugu mianersortumik ileqqoqarnissaq pingaaruteqarpoq.

Assaat eqqortumik errortorat 45-60 sekundinik sivisussuseqartarpoq, tassa assaat qaqorsaammik 15-20 sekundit missaanni errortorneqassapput, qaqorsaatillu peernissaanut imermik kuutsitsivigineqassallutik kingornalu allarterneqassallutik.

Assaat errortukulagaanni ameq panertarpoq. Taamaammat meeqqat tarngummik isugutsersaammik akulikitsumik atuisariaqarput, ajornanngippat errortoreernerit tamaasa – pingaartumik meeqqap assai panertooreerpata.

Periuseq:

  • Assaat imermik kissartumik uunanngitsumilli errortukkit
  • Assaat qaqorsaasinnginneranni masatserneqassapput
  • Assaat qaqorsaataarutsillugit kuutsitsivigilluakkit (meeqqat amerlasuut assammik tunui qaqorsaataajarluanngitsoortarpaat)
  • Assaat errortoreerukkit panersikkit
  • Assat paninnginniassammata tarngut panertoornaveeqqutilik tipigissaatitaqanngitsoq atoruk

Assannut spritip atorneqarnissaa pillugu paasissutissat

Assannut spriti errortorluartarnermut taarsiutaasinnaanngilaq assaallu errortoqqaarsimatinnagit sunniutikinnerusarluni. Imeq qaqorsaallu atorlugit errortornerup virusit minguillu assannit peersittarpaat. Taamaaliornikkuttaaq ipeq assanniittoq virusip uumaffigisinnaasaa peerneqartarpoq. Taamaammat assersuutigalugu assaat ersittumik ipeqarsimagaangata tamatigut imeq qaqorsaallu atorneqartassapput.

Assannut spritip virusi toquttarpaa, kisianni nalinginnaasumik assaat naammaginartumik errortortarnerat naammattarpoq. Taamaakkaluartoq assannut spriti errortoreernerup kingorna tapertaasinnaavoq, tassa assannut spriti tunillannartuiaataammat pitsaasumik sunniuteqartartoq. Tamatuma saniatigut imeq qaqorsaallu atorlugit assaat errortornissaannut periarfissaqannginnermi assannut spritip atornissaa pitsaasuusinnaavoq.

Assannut spriti assaat errortortarneranninngaanniit amermut panertitsinnginnerusarpoq. Assatimmi errortoraangakkit ammit panernerulersittarpat. Paarlattuanilli assannut spriti glycerinimik akusaq amermik isugutsertitsisarpoq.

Assannut spriti sulinermi atortuuvoq pingaarutilik, assersuutigalugu peqqinnissaqarfimmi, angerlarsimasunut ikiorteqarfimmi aamma utoqqaat angerlarsimaffiini, taakkunani tunillaanissamut aarlerinaat annertunerugajuttarpoq sulisullu ullormut arlaleriarujussuarlutik assatik errortortarpaat.

COVID-19-imik tunillatsissimasumik ilaasoqarsimaguma biilikka (taxat) qanoq eqqiassavakka?
  • Imermik qaqorsaammillu nalinginnaasumik eqqiarneqassapput – ajornanngippat biilini tunillanneqarsimasumit attorneqarsimasut qaanut tunillannartuiaatit atorlugit tunillannartuiakkit (spritsi)
  • Tunillatsittoqarsimaneranik suli uppernarsaateqanngippat malittarisassat uku atukkit, tassami siullermeersumik ersiuteqalerneq ullunik marlunnik sioqqullugu tunillaasoqarsinnaasarmat aamma/imaluunniit inuk taanna COVID-19-imik tunillanneqarsimaguni tunillaasinnaammat

Aamma atuarsinnaavatit
Nutarterneqarpoq: 16. marts 2021