airplanebooksbriefcase business cogs cross election entertainment fish house law lockmedicalpeopleselfservices socialtax

Tunillaassuinermik pinaveersaartitsineq pillugu siunnersuutit nalinginnaasut

Tunillaassuineq pinaveersaartinniarlugu iliuuserisinnaasat pitsaanerpaaq tassaavoq tunillaassuinermik pinaveersaartitsinermut nalinginnaasumik siunnersuutivut 6-t malissallugit qanoq iliorninnullu tamanut ilanngutitillugit – angerlarsimaffimmi, kikkut tamarmik tikittagaanni, atuarfimmi aamma suliffimmi. Aamma meeqqat siunnersuutinik malinninnissaannik ikiussallugit eqqaamajuk.

Nunatta nakorsaaneqarfianit siunnersuutit nalinginnaasut arfinillit aaku.
1. COVID-19-qarnermik ersiutaasunik peqaruit, misilitsinnermi tunillatsissimasutut nalilerneqaruit imaluunniit coronavirusimik nutaamik tunillatsisimasumut qanimut attaveqaruit imminut mattusimatigit

COVID-19-qarnermik ersiutaasunik peqaruit, misilitsinnermi tunillatsissimasutut nalilerneqaruit imaluunniit coronavirusimik nutaamik tunillatsisimasumut qanimut attaveqaruit nammineerlutit imminut mattusimatigit.

Imminut mattusimatinneq ima isumaqarpoq:

  • Angerlarsimaannassasutit inuillu illoqatiginngisatit naapisimaassanngikkitit.
  • Inuit illoqatigisatit qanimut attaveqarfigissanngikkitit.
  • Eqqiluisaarluarneq pitsaasumillu eqqiaaneq immikkut maluginiassagitit.


Coronavirusimik nutaamik tunillatsissimasutut nalilerneqarsimaguit imaluunniit inummut tunillatsissimasumut qanimut attaveqaruit illoqatigisavillu naammattumik ungasinnissannut periarfissaqanngikkuit taava immaqa kommunerisannit angerlarsimaffippit avataani nammineq piumassutsinnik inissinneqarnissannut akuerineqassaatit. Imaassinnaavoq illit angerlarsimaffiit mikisunnguusoq imaluunniit inunnik COVID-19-eqalerunik perulullutik napparsimalernissaminnut ulorianartorsiortunik illoqateqartutit.

Corona pillugu saaffiginnittarfimmut ammasumut sianerit periarfissatillu pillugit sukumniinerusumik paasisaqarit.

2. Assatit asakulaakkit imaluunniit assannut spriti atortaruk (video)

Assaat errortorluartarnerat pequtitigut, assatsigut kiinnakkullu tuniluuttoqarnissaata pinaveersaarnissaannut iliuusissatsialaavoq.

Assaat asannerat assannullu spriti assigiimmik sunniuteqarput. Taamaattoq assat ersittumik ippappata, assaat isugutappata, anartarfimmeereernerup kingornatigut, nangiliinerup kingornatigut nerisassanillu passussinnginnermi asannissaq tamatigut innersuussutigineqarpoq. Tassami assannut spriti aatsaat iluamik sunniuteqarsinnaammat assaat panerpata ersittumillu ipeqanngippata.

Eqqaamallugu meeqqat aamma assatsigut eqqiluisaarluarnissamik ikiornissai.

3. Talinnut quersorit imaluunniit tangajorit

Quersornermi periaatsit pitsaasut kuseriarnertigut tunillaassornermik attuillunilu tunillaassuinermik pinaveersaartitsisarput.

Taamaattumik uku innersuussutigineqarput:

  • Aannut imaluunniit kakkissarfimmut pappiaraasumut quersorit. Kingornatigullu assatit asakkit imaluunniit sprititikkit.
  • Assannut quersortuussagaluaruit kingornatigut assatit asakkit imaluunniit sprititerlugit.

4. Assamminneq, ersakkut kunissineq pakkussinerlu pinaveersaakkit

Attuilluni tunillaaneq inunnit tunillatsissimasunit tunillaassutaanerpaagunarpoq, naak tunillaasoq nappaateqarnermik ersiutaasoqanngikkaluarpalluunniit. Taamaattumik innersuussutigaarput allanut timikkut attuinissaq pinngitsuussagit - assersuutigalugu assamminneq, ersakkut kunissineq pakkussinerlu - ersiutaasoqanngikkaluaruilluunniit.

5. Eqqiluisaarnissaq ukkataralugu – angerlarsimaffimi aamma suliffimmi

Attuilluni tunillatsinnissamik ulorianaataasoq annerpaavoq inuppassuarnit attorneqartartutigut, ass. matut tigummivii, majuartarfiit sinaakkutaat, qulliit ikittarfii, toortakkat, qarasaasiap allanniarluni naqitassartai, issiaviit ikusimmiffii, nerriviit sinaat, pinngussat, atortut erngup kuuffii anartarfiit il.il.

”Attuiffiusartut” tamakku akulikitsumik sukumiisumillu eqqiartakkit eqqiaatinik nalinginnaasunik immaqalu aamma bakterianik toqoraatinik.

6. Immissinnut qanillinaveersaarlusi – allallu allanik eqqarsaateqaqqukkit

Quersornikkut, tangajornikkut, suaartarnikkut, erinarsornikkut il.il. qanittunut kuseriarnikkut tunillaasoqarsinnaavoq. Allanut ungasinniarniaraanni timikkullu qanimut attaveqarneq killilersimagaanni kuseriarnikkut tunillaaneq aamma attuinikkut tunillaaneq pinngitsoortinneqarsinnaavoq.

Taamaattumik inunnut allanut minnerpaamik meterinik marlunnik ungasissuseqartassasutit innersuussutigaarput.

Aamma atuarsinnaavatit
Nutarterneqarpoq: 25. marts 2021