airplanebooksbriefcase business cogs cross election entertainment fish house law lockmedicalpeopleselfservices socialtax

Tunillaassuineq pinaveersaaruk

Napparsimanngikkaluaruilluunniit inuiaqatigiinni tunillaassuuttoqarnissaanut pinaveersaartitseqataanissat pingaaruteqarpoq. Taamaaliornikkut immitsinnut paaralutalu allat paarissavagut.
Tunillaassuunnerup pinaveersaartinnissaannut iliuusissat pingaarnerpaat (video)

Tunillaassuunnerup pinaveersaartinnissaannut iliuusissat pingaarnerpaat tassaapput:

  1. Tunillatsissimasut angerlarsimaannarnissaat, ersiuteqarnermi imminut mattusimatinnissaq misissortinnissarlu, kiisalu tunillatsissimasunut qanillisimasunik paasiniaaneq.
  2. Eqqiluisaarneq quersornermi ileqqorisassat, assaat eqqiluitsuutinnerat kiisalu attorneqarsinnaasut ikilisillugillu eqqiarneqartarnerat pingaartillugit.
  3. Inunnut qanillisarnerit ikilisinnerat - pingaartumik qanimut attaveqaqatigiinnermi ungasissutsip, inuit amerlassusiata, qanillisaqartarnerup akulikissusiata sivisussusiatalu, silaannarissaasarnissap kiisalu assiaqutinik atuinerup pingaartinnerisigut.



Siunnersuutit nalinginnaat arfinillit
  • Napparsimaguit angerlarsimagit.
  • Assatit errortukulakkit, imaluunniit assannut spriti atoruk.
  • Tallinnut quersorlutilluunniit tangajorit.
  • Assamminneq, ersakkut kunissineq eqitaarinerlu pinaveersaakkit – inunnik allanik timikkut attugaqarnissat killileruk.
  • Eqqiaaneq eqqumaffigiuk – angerlarsimaffinni suliffinnilu.
  • Inunnut qanillinaveersaarlutillu allat innimiginninnissaannik piumaffigikkit.

Quersornermi ileqqorisassat

Quersornermi ileqqut pitsaasut kuseriarnertigut tuniluunnernik aamma virusit assannut pinerata kingornagut pisattat qaannut attorneqarsinnaasunullu ingerlateqqinneqartarnerannik pinaveersaartitsisarput.

Pisattat qaanni viruseqalersitsisoqarsimatillugu inuit allat pisattanik attuisinnaasarput tunillatsinnermikkullu nappaat inuiaqatigiinnut ingerlateqqissinnaasarlugu.

Inimi quersoraanni tangajoraanniluunniit kuseriarneeqqat virusillit inimut siaruarneqarsinnaasarput, inuillu amerlariaraangata kuseriarneeqqat suli natermut tunnatik tunillaasinnaasarlutik.

Quersorneq tangajornerlu eqqarsaatigalugit siunnersuutit:

  • Kakkissarfimmut pappiaramut tallinnulluunniit quersorlutilluunniit tangajorit, kingornalu assatit errortoriarlugit sprititilerlugit.
  • Assannut quersorlutilluunniit tangajorsimaguit erngerlutit assatit errortukkit sprititerlugilluunniit.

Paasiniaanermut, misissortinnissamut angerlarsimaannarnissamullu innersuussutit

Paasiniaaneq, misissortinnissaq angerlarsimaannarnissarlu eqqarsaatigalugit makku innersuussutigineqarput:

  • Ersiuteqarnikkut COVID-19-imik tunillatsissimanermut pasitsaanneqartoqarsinnaavoq, taamaattoqartillugulu imminut angerlarsimaannartillunilu COVID-19-imut misissortittoqassaaq.
  • Piffissami tunillaaffiusinnaasumi COVID-19-imik tunillatsissimasumut qanillisimasut imminnut angerlarsimaannartillutillu COVID-19-imut misissortissapput.
  • Qanillisimasut paasiniarneqassapput imminnullu angerlarsimaannartinnissaannik COVID-19-imullu misissortinnissaannik ilitsersorneqassallutik. Qanillisimasunik paasiniaaneq Nakorsaaneqarfiup ataani Corona pillugu allattoqarfimmi pisussaavoq.
  • Init kikkunnit tamanit iserfigineqarsinnaasut COVID-19-imik tunillatsissimanermut ersiutilinnit iserfigineqarsinnaannginnerat pillugu erseqqarissunik allagartalersorneqassapput.
  • Suliffeqarfiit, ilinniarfiit il.il. COVID-19-imik tunillatsissimanermut ersiutilinnit iserfigineqarsinnaannginnerat pillugu erseqqarissunik allagartalersorneqarsimasariaqarput, aamma sulisut, atuartut, ilinniartut, pulaartut il.il. COVID-19-imut ersiutillit pillugit periusissanik paasiuminartunik peqartariaqarput, taakkununnga angerlarsimalluni sulineq/ilinniarneq qanoq aaqqissuunneqarsinnaanersoq ilanngullugu.
  • Imminut mattusimatinnerup unioqqutinneqartariaqarnerani, ass. peqqinnissaqarfiliarnermi, qanermut assiaqut atorneqassaaq.

Assaat eqqiluitsuutinnissaat (video)

Assaat eqqiluitsuutinnerat pisattatigut, assatsigut kiinnakkullu tuniluuttoqarnissaanik pinaveersaartitsinermut iliuusissaavoq pitsaasoq. Imeq qaqorsaallu atorlugit assaat errortorneratigut ipeq tappiorannartullu errortorluartoqarsimatillugu amermit kaanngartinneqarlutillu piiarneqartarput assaallu eqqiluitsunngortinneqartarlutik.



Assaat eqqiluitsuutinnissaata qulakkeernissaa eqqarsaatigalugu makku innersuussutigineqarput:

  • Assatit errortukulallugilluunniit sprititikulakkit pisartunullu akulikissusiat naleqqussarlugu, assersuutigalugu angerlarsimaffimmut, suliffimmut, atuarfimmut niuertarfimmut assigisaannullu apuunnermi taakkunanngalu aninermi, sammisaqarnerup nalaani, nerinnginnermi imaluunniit kakkissarfimmut assannulluunniit quersornermi/tangajornermi kiisalu qanermut assiaqutip peersimatinneqarnerata kingornagut ateqqilernerani.
  • Assaat imermik qaqorsaammillu eqqortumik errortorneqartariaqarput, tassa imaappoq minutsimi ataatsimi. Perusuersartarfimmeereernermi, nangimik taarseereernermi nerisassiunnginnermilu assaat isugutappata takussaasunilluunniit ipeqarpata sprititernissaannit errortorneqarnissat innersuunnarneruvoq.
  • Assanut spriti sumiiffinni assannut errortuivissaqanngitsuni atussallugu naleqqunneruvoq. Assannut spritip tarngunnerani assaat sivikinnerpaamik sekundini 30-ni isugutatsinneqassapput.
  • Inuit amerlasuut akornanniinnermi sumiiffinniluunniit attugassarpassualinni, soorlu pisortat angallassissutaanni katersuussimasuniluunniit, assannut spriti saviatsilluunniit nassatarikkit.
  • Assatit eqqiluikkaangata aatsaat kiinnat attortassavat kiinnallu attorsimagaangakku assatit errortorlugilluunniit sprititertassallugit.
  • Assamminnik eqqortumik eqqiluisaartitsisinnaanngitsut ikiukkit. Assersuutigalugu meeqqat nukangasut eqqortumik errortoriaaseqarnissaannut assaallu aniorneqalernissaasa (eksemeqalernissaasa) pinaveersaartitsinissaannut ikiorneqassapput.
  • Assaat tarngummik isugutatsitsisartumik assingusumilluunniit tanittarnissaat assaat panerpallaalernissaasa aniorneqalinnginnissaasalu (eksemeqalinnginnissaasa) pinaveersaartinnissaannut isumassarsiatsialaasinnaavoq. Tarngut isugutatsitsisartoq orsulik (orsoqassusia 40-70%) tipigissaateqanngitsorlu meeqqanut atorneqarsinnaavoq.

Pisortat ingerlatsiviutaannut, suliffeqarfinnut, niuertarfinnut, atuarfinnut, peqatigiiffinnut, angallassissutinut kikkunnit tamanit ilaaffigineqarsinnaasunut allanullu assersuutit:
  • Sulisut, pulaartut, sullitat, atuartut, ilinniartut allallu assamminnik eqqiluitsuutitsisinnaanerat ajornaatsuutiguk.
  • Sumiiffinni inuppassuaqarfiulluniluunniit attugassarpassuaqarfiusumi assannut bakteriaajaatit pissarsiariuminartuussapput, ass. pisortat ingerlatsiviutaanni, isaarissani, suliffeqarfinni, niuertarfinni, nerisassanik sassaalliuteqartarfinni, timersortarfinni il.il.
  • Ullup ingerlanerani assannut spritip immernissaa eqqumaffigineqassaaq, assannullu spritimik isaarissamiittoqarnissaa attorneqartartullu, ass. akiliisarfiit, automatit normunik tigusisarfillit, kaffeautomatit, nillartaartitsiviit il.il., eqqaanniittoqarnissaa qulakkeerneqassaaq.
  • Inini kikkunnit tamanit iserfigineqarsinnaasuni amerlasuunilluunniit isersimaffigineqarsinnaasuni, ass. suliffeqarfinni, imeq qaqorsaallu atorlugit errortorsinnaanissat ajornaatsuussaaq allarutissianillu ataasiaannarlutik atortartunik allartertoqarsinnaassalluni. Allarutit qaqorsaatillu ataatsimut atorneqartartut atorneqassanngillat.

Kalaallit Nunaannut angalasut

Nunanit allanit tikeqqammersut:

  • Najukkamik avataanut pigaangamik qanermut assiaqut atortassavaat.
  • Angerlarsimaannaqqusaanertik unioqqutissanngilaat
  • Katersorsimasunut, aaqqissuussanut, pisunut assigisaannullu COVID-19-imik tunillatsissimannginnerminnut uppernarsaatissaqartinnatik peqataaqqusaanngillat.
  • Pisariaqavitsillugu aatsaat pisiarisartakkaminnik pisariaqartitaminnillu pisiniarsinnaapput.

Kikkunnit tamanit attorneqartartut eqqiaanerlu

Kikkunnit tamanit attorneqarsinnaasut, ass. tigummiviit, sinaakkutit, innaallagialersuiffiit, tuugassat, tastaturit, musit, akiliisarfiit, issiaviit ornavaffii, nerriviit sinaat, pinngussat, atortut, kuuffiit, perusuersartarfiit allarpassuillu qaavi amerlasuunit attorneqartarput.

Attorneqartartut amerlappata tuniluunnerunissamut aarlerinaat malunnaatilimmik annerulissaaq.

Taamaattumik kikkunnit tamanit attorneqartartunik eqqiaakulanissaq immikkut ittumik pingaaruteqarpoq.

Imeq qaqorsaallu atorlugit eqqiaanikkut ipeq tappiorannartullu pisattat qaavinit kaanngartinneqarlutillu piiarneqartarput, taamaalillunilu tuniluuttoqarnissaannut aarlerinaat minnerulersinneqartarluni.

Amerlanertigut imeq qaqorsaallu atorlugit eqqiaaneq naammattarpoq, nalilersuereernerulli kingornagut mianersornissamik tunngaveqarluni bakteriaajaat ilanngunneqarsinnaavoq.

Pisattat masatserneqarnissaminnut naleqqussagaanngitsut, ass. elektronikkit, oqarasuaatit, qarasaasiat angallattakkat il.il. imermik qaqorsaammillu eqqiaanermut taarsiullugu bakteriaajarneqarsinnaapput. Tamakkualu saniatigut atortussanittaaq allanik peqarpoq eqqiaatit allat atorlugit eqqiarneqartariaqartunik, ass. qulliit UV-t, gassit dampilluunniit. Taamaattoq pisariaqartuaannarpoq sioqqutsisumik eqqiaasarnissaq, inimi bakteriaajaaffiusussami sukannersunik maleruagassaqarnissaq kiisalu sulisut atortunik passussisinnaanissaminnut immikkut tunuliaqutaqarnissaat.

Ukiup qanoq ilineranut naleqquttumik eqqiaasarneq akuttussusilerneqartariaqarpoq, taamaaliornikkut qulakkeerneqassammat ukiassalernerani ukiamilu akulikinnerusumik eqqiaasoqartarnissaa. Tamatuma saniatigut eqqiaasarneq pisartunut naleqquttumik akuttussusilerneqartariaqarpoq, taamaaliornikkut qulakkeerneqassammat inini pisunilu pulaarterpassuaqarfiusartumi aamma/imaluunniit attugassarpassualinni, ass. paaqqinnittarfinni, atuarfinni, niuertarfinni nerisassanik sassaalliuteqartarfinni, pisortat angallassissutaanni, timigissartarfinni, inuussutissarsiorfinni minnerusuni il.il., attorneqarsinnaasut akulikinnerusumik eqqiartuarneqartarnissaat. Atisanittaaq, coronavirusimik nutaamik mingutsinneqarsinnaasunik, akulikinnerusumik errorsisarnissaq atuuppoq, naak tamakkunatigut tuniluunnerup pinissaa killeqarnerarneqaraluartoq. Tamakkua saniatigut coronavirusip nutaap nerisassatigut tuniluuttarneranut takussutissaqanngilaq.

Attorneqarsinnaasunit tuniluuttoqarnissaata pinaveersaartinnissaa eqqarsaatigalugu makku siunnersuutigineqarput:

  • Tamanit attorneqarsinnaasut suussusersinissaat nalunaaqutsernissaallu, soorlu matut tigummiviit tuugassallu.
  • Attorneqarsinnaasut pisariaqanngitsut peerneqassapput, soorlu sullissinerup pitsaassusianik nalilersuisarfiit tuugassartallit, pisiassanik immikkoortitsilluni akiliisarfiit eqqaanni allagartaliussat il.il.
  • Atortut assannik attoqqaarneqartariaqanngitsunngortiterneqassapput, soorlu qaammaqqutinut maluginiutilinnut, kuuffinnut assamik attoqqaarneqartariaqanngitsunut, matunut namminneq ammarlutilluunniit ikusik atorlugu ammarneqarsinnaasunut, akiliisarfinnut attoqqaarneqartariaqanngitsunut il.il.
  • Nammineq tigooraalluni nerinermi (buffet), nereqatigiinnermi, skålimit ataatsimit tigooqqaaqatigiinnermi nammineq atortorisat, ataasiaannarluni atortakkat imaluunniit inummut ataatsimut nerisassatut naatsorsuilluni sassaalliuteqarnerit atorneqartariaqarput.
  • Akulikitsumik peqqissaartumillu kikkunnit tamanit attorneqartartut eqqiarneqartassapput, ullormut ikinnerpaamik ataasiarlutik pulaartullu akulikinneranni akulikinnerusumik.
  • Eqqaaviit ulikkaavinnginneranni ullut tamaasa imaarneqartassapput (taarserneqartassapput).
  • Atortussat ikiuutissallu tamanit atorneqartartut sullitap, atuisup assigisaasalu tulliisa atunnginneranni tamatigut eqqiarneqartassapput, imaluunniit nammineq pigisat ataasiaannarlutilluunniit atorneqarsinnaasut atorneqartassapput.
  • Atortut atuisup ataatsip atuereerneratigut eqqiarneqartuarsinnaanngitsut atornaveersaarneqassapput, soorlu oqarasuaatit, tabletit il.il.
  • Atisanik errorsinermi errorsinissamut ilitsersuutit atisaniittut malinneqassapput, najugaqatigiilli coronavirusimik nutaamik tunillatsissimasortaqarpata allarutit, oqorutit qalii iluatigullu atisat minnerpaamik 60 gradimi errorsisoqartassaaq. Annoraamerngit kuseriarnernut aniatinneqartunullu qinngamit pisunut attuunnissaminnut ilimanaateqarnerit, soorlu qungaserutit aaqqatillu, akulikinnerusumik errorneqartarnissaat isumaliutigineqassaaq.

Allanut qanillinaveersaarneq timikkullu attugaqarnaveersaarneq

Quersornikkut, tangajornikkut, nillianikkut, erinarsornikkut allatigullu kuserneeqqatigut qanittumiittunut tunillaaneq pisinnaasarpoq.

Taamaattumik kuserneeqqatigut timikkullu attugaqarsimanikkut tunillaanerit pinngitsoortinneqarsinnaasarput allanut qanillinaveersaarnikkut timikkullu attugaqartarnerup killilersimaneratigut.

Kalaallit Nunaanni inoqatinut 2 meterinik ungasillisimanissaq innersuussutigineqarpoq.

Qanillisimasat ikinneruneratigut coronavirusimik nutaamik tunillatsinnissamut aarlerinaat minnerulersarpoq, tassa imaappoq inunnik ikinnerusunik qanillisaqarsimagaanni tunillatsinnissamut ilimanaat tunillaanissarlu ilimanaatikinnerulersarpoq. Taamaattumik pingaaruteqarpoq killilersuiniarnissaq, qanoq amerlatigisut takunissat aamma ilagisaqarnermi qanoq iliornissap eqqarsaatiginissaa. Tamanna sulinerup avataani sulinerup nalaanisulli ippoq pingaartumik inunni amerlasuujullutik katersorsimasuni, siornatigut takusarsimasatsitulli inuppassuit katersuunneratigut 'tuniluunnerujussuarnik' kinguneqartartuni.

Allanut qanillinaveersaarnissamut timikkullu attugaqarnaveersaarnissamut isumassarsiorfissat

  • Init kikkunnit tamanit iserfigineqarsinnaasut, atortorissaarutit, niuertarfiit, nerisassanik sassaalliuteqartarfiit, suliffeqarfiit il.il. sulisunik, pulaartunik sullitanillu angallattoqarfiusartut 2 meterinik ungasitsiginissamut qanoq ilisukkulluunniit periarfissaqartoqarnissaanik qulakkeerinnissapput. Tamanna aamma atuuppoq ass. isaarissani, akiliisarfinni, kiffartuussinermut atortorissaarutit eqqaanni, inini kikkunnit tamanit iserfigineqarsinnaasuni perusuersartarfinnilu. Tamanna allagartatigut erseqqissutigut, inip immikkoortulersorneratigut, nerriviit inississornerisigut, nerriviit sinaanni uneqqusissutinik nalunaaqutsersuinikkut, natermi nalunaaqutsersuinikkut assigisaatigullu qanoq iliornissamut aaqqissuussissutaasinnaasutigut allanut qanillinaveersaarnissamut iluaqutaasinnaasutigut pisinnaavoq. Niuertarfinnut isaarissani inuit qanoq amerlatigisut isersimasinnaanerannik erseqqissumik allagartalersuisoqassaaq.
  • Paaqqinnittarfinni, atuarfinni allanilu atassuteqartarnerit ikilisinneqarsinnaapput assersuutigalugu meeqqat eqimattanut/ininut ikinnerusunik aalajangersimasunillu inuttaqartunut agguarnerisigut aalajangersimasumillu sulisoqartinnerisigut. Aamma atassuteqartarnerit ikilisinneqarsinnaapput klassit anitsiartarfiisa agguarnerisigut, ass. anitsiarfissat nikisinnerisigut. Atuartitsivinni sumiiffinniluunniit allani qanimut atassuteqartoqarnissaa killilersimaniarlugu nerriviit kinguleriiaartunngorlugit issiasulluunniit akimut imminnut isigisinnaasunngorlugit inississorneqarsinnaapput.
  • Suliffeqarfinni sulisut ataatsimiinnissaat nikisinneqarsinnaapput, aamma isersimaartarfiit ataatsimiittarfiillu matuneqarlutilluunniit aaqqissuunneqarsinnaapput soorlu issiaviit ikilisinnerisigut, taamaalilluni allanut qanillinaveersaarnissamut innersuussut malinneqarsinnaalissammat.
  • Pisortat angallassissutaannut ilaasut allanut qanillinaveersaarnissaannut ikiorneqassapput atassuteqarfiusinnaasullu ikilisinneqassallutik, ass. ilaasut ninniortinnissaasa killilernerisigut, nikorfallutik ilaasussat killilernerisigut, sunut tamanut angalanissamut periarfissap annikillisinnerisigut il.il.
  • Kiffartuussivinni, peqqinnissaqarfinni allanilu utaqqisut siuleriiaarnissaasa utaqqisarfiillu inunnik ulikkaarnissaasa killilernissaannut piffissamik inniminniinerit, aamma timikkut attuinissamik attaveqarfissallu amerlassusiisa ikinnerulernissaannik killileeqataasinnaasut, atorneqarsinnaapput.

Aamma atuarsinnaavatit

Nutarterneqarpoq: 23. marts 2021